怪可憐又可愛

今日潼潼發燒，應該係打左預防疫苗之後既反應。

今日下晝潼潼已經比平時扭計，當時已經諗緊佢係咪唔舒服，不過後黎佢訓左覺，訓醒後又好似無乜野所以就不以為意，仲帶左潼潼出去玩添。係公園玩既時候，潼潼雙手一直冰凍，玩既時候亦表現得不及從前般雀躍。之後我地見天色開始陰暗，天氣開始清涼，就番入商場逛逛。期間漸漸覺得不對勁，潼潼雙手冰凍，但臉頰卻熱燙燙，我地斷定潼潼係發燒喇！即時改變計劃，諗住帶潼潼去睇佢睇開既兒科醫生，誰知湊巧地醫生竟然放左假．．．　

最後唯有先番屋企吃過退燒藥睇情況再作決定喇！潼潼爸更即時係附近買左退熱貼俾潼潼貼上。潼潼額上貼上退熱貼，兩個面頰紅卜卜咁，我睇見佢個樣真係怪可憐又可愛。

潼潼番到屋企食左退燒葯藥之後情況好轉左，只係潼潼就好唔鐘意身上既退熱貼，每次貼上都打個震，不斷搖住雙手係度叫。又係另一個攪笑既場面。

希望潼潼能夠盡快退燒，同埋呢兩日都有流鼻水，希望傷風都可以自動好番，否則星期一依然係要去睇醫生呢！（醫生星期一先放完假番工呀！）