童心

早前買左幾本圖畫書番黎俾潼潼睇，希望佢平時係屋企唔會咁無聊，係度浪費哂d時間。可惜潼潼興趣不大，當我係佢面前翻開書本，佢就要走開，或者拎住書本亂搖。

尋晚我又拎起圖畫書俾佢睇，我同佢講「獅子」，跟住對佢「吼」一聲，話俾佢知係獅子既叫聲。潼潼聽到我發出奇怪既聲音就係度笑。我見佢笑得咁開心，我又翻去其它動物既一頁，繼續扮其它動物既叫聲。潼潼每聽到我發出古怪既聲音就好開心係度笑。雖然我唔知佢有無留意入面既圖畫，但係起碼吸引到佢既注意力。

原來教育小朋友，都要懷有一份「童心」，要識得同佢一齊玩。太正經地說教係行唔通。學會從遊戲中學習，係做家長重要既一課。