第一次飲宴

今次係潼潼的一次去飲宴。

去之前都有少少擔心潼潼係咪可以坐定定咁長時間。果然，係剛入席既時候潼潼就叫住話要走。

好彩呢個時候開始播放一對新人既生活照，或者潼潼以為有SHOW睇，又乖乖咁坐番係度睇「節目」。期間又好ENJOY舉杯飲勝的「環節」(可能因為有得乘機飲橙汁)，仲有回禮小禮物玩，同埋同朋友一歲多既BB一齊玩。 (我有點意外潼潼接受到BB，肯同佢一齊玩)

雖然食野唔乖，但總算順利過渡。

 

有其母必有其女

為左怕上網時被潼潼纏住，所以我每次上網都要等晚上潼潼熟睇以後。但係唔知點解好多時潼潼半夜都會醒，然後發現房入面無人就會喊住叫「媽咪~」咁我又要番入房拍番佢訓先再出黎上網。

尋晚又當我上網既時候，突然聽到好響亮既「撻撻」聲由遠而近。我轉個面就見到潼潼光著腳子，扁著咀，縐著眉的由睡房走出黎搵我。我連忙抱佢番入房訓，仲要連聲「對唔住」哈哈! 好有趣！潼潼唔再剩係識得係房入面喊喇！而係走出黎搵我表示不滿（潼潼心底話：老是趁我睡著的時候就上網唔陪我訓覺。）呢個情況似曾相識，就似當年潼潼媽半夜起黎，然後怒「啤」在深夜時候仍然在上網既潼潼爸時一樣。不過唔同既係潼潼媽會好緊張咁陪潼潼番一房，而爸爸當年就無咁聽話咯！

陪潼潼訓番之後，潼潼媽又唔聽話坐番係電腦前面。過一陣，又聽到潼潼係房入面叫「媽咪~」哈哈！好有命令式既語調。今次走唔甩喇！要乖乖熄電腦番入房陪寶貝喇！

提子

呢晚爸爸媽媽開餐既時候，潼潼食緊提子。

爸爸：我有無得食架？

潼潼：有～～　俾一粒你。

最後潼潼將所有提子食哂。

爸爸：你又話留番一粒俾我既？

潼潼：你未食哂飯！

爸爸：你都無留番俾我，咁我食哂飯咪無得食。

潼潼：你都未食哂飯！　

（所以話潼潼的語言發展比較差，只有重複語句，未識因應對方說話答話）

潼潼：我俾三分鐘你！

（潼潼媽常用的招數）

爸爸：三分鐘咁少？三分鐘點食哂飯呀？十分鐘啦！

潼潼：好啦！十分鐘！

爸爸：你話留番粒提子俾我，咁你食哂，咁我十分鐘食哂飯你邊有提子俾我？

潼潼無理會爸爸，只催促姐姐：姐姐，拎個鬧鐘俾我丫！

跟住潼潼媽幫潼潼調校好鬧鐘。期間潼潼不時望下鬧鐘，又望下爸爸。

潼潼：仲有五分鐘丫！

爸爸食哂飯之後：我食哂飯喇喎！我粒提子呢？

潼潼毫不在意，揚揚手：聽日買啦～　唔緊要～～

爸爸：咁我而家食哂飯，但係你食哂提子我無得食。

潼潼又重複（扮傻嗎）：聽日買啦～　唔緊要～～

最後姐姐從雪櫃拎出剩番既少量既提子俾潼潼遞俾爸爸。

潼潼：喇！有囉！

爸爸：呢D姐姐俾我黎架喎！係你留俾我既咩?

潼潼：係呀！

 

 

保護財產

原來潼潼已經學會要保護自己既財產。

話說今日潼潼媽番工既時候先記起自己八達通無哂錢，兼且用哂散銀。

潼潼媽：「姐姐~ 你有無散紙呀?」

姐姐：「我都無呀！你係潼潼度拎啦！」

係廁所洗緊面既潼潼：「唔好呀！！」

我已經係潼潼個吉蒂包包度數緊錢。

潼潼係廁所衝出黎：「唔好呀！唔好拎我D錢呀！」

潼潼媽：「媽咪今晚番黎俾番你丫！」

潼潼：「唔好呀！」

我準備出門，但係潼潼唔霸休要纏住我：「唔好呀！」

擾攘左好一陣，最後姐姐抱走左潼潼。

係我出左門口閂埋門既一刻聽到潼潼：「哇~~~~~~~~ 」

好耐無聽到潼潼喊得咁大聲。 估唔到個衰妹已經對「金錢」有不錯既概念。

 

情緒管理

好早既時候係淘寶買左一批書(詳情可按此看)。其中一套係讓小朋友認識自己既情緒。

呢套書當作故事講其實唔係太合適，所以都好少拎黎同潼潼讀。不過呢本書呢日就大派用場。

話說呢日係旺角行人專用區行時，潼潼見到有人拎住人家宣傳用既氫氣球，潼潼見到又好想要，於是爸爸帶佢去搵， 可惜都係搵唔到。

沿路走既時候，甚至到坐車的時候，潼潼依然叫住話想要波波。係車上面，我用學番黎既情緒管理方法去穩住潼潼既情緒，算是有效。最後潼潼倦極入睡。

誰知番到屋企，佢依然掂記住個波波，喊住話想要波波。我將佢擁抱住既時候，位置剛巧係書架旁，就係呢個時候見到呢套書其中「我不願悲傷」既一本。於是就拎出黎同潼潼一齊睇，讓佢知道每個人都會有唔開心既時候；唔開心只會係暫時性，唔會永久存在；唔開心既時候可以點做。

原來育兒都有「工具書」。呢d工具書平時真係好少用得著，不過總要放一套以備不時之需。

潼潼聽完故事當然已經心情好轉，只係我被潼潼纏住，累我要一連氣的講左四本情緒故事書呢！