三歲九個月

潼潼剛剛滿三歲九個月，身高96cm，人長大左不少。好多時候，訓到半夜潼潼就爬到我既床上，要跟我地一齊訓。以前因為佢身體短少，攬住佢時，好似可以攬住佢整個身體咁。早前先發現，而家即使我將手盡量伸直，已經掂唔到佢既腳板。想深一層，潼潼而家既身高都幾乎係我身高既三份二喇 ! 真係大個囡喇 !

潼潼越大，越發現自己既時間唔夠用。有時因為晚歸，怕潼潼晚睡，最後被逼縮短講故事既時間，揀故事書時都要挑內容簡短既故事。英文故事就更加唔係晚晚可以唸。還好，潼潼己經認得部份圖書書名，可以讀出「晶晶的耳朵」﹑「湯姆去海灘」﹑「幾點鐘」﹑「邋遢先生」﹑「傷腦筋先生」等等的一堆既書名，總算有點成績。我諗潼潼未必真係認得字，而只係記得書名，但總算係個好開始。現階段潼潼只接受我「讀」出書名，不過就唔准我「讀」內容。我諗等佢遲d有多d機會接觸文字既時候，我再開始嘗試對佢「讀」故事會比較好。 

呢兩星期媽me感到好沮喪，感到工作好困身。好希望可以花更多既時候係潼潼身上，但就成日夜歸。姐姐就快完約，考慮到經濟問題，兼且想訓練潼潼既自理能力，所以打算唔再僱用外傭，而改為由本地姨姨接潼潼放學。但係媽me成日咁夜放工，根本照顧唔到潼潼，如果連姐姐咁親近既人都唔係身邊，怕會對潼潼做成傷害。

能做一個全職媽媽多好!

十週年校慶活動 - 親子旅行

潼潼就讀既幼稚園今年有三項十週年校慶活動，今日既節目就係佢地其中一項活動 - BBQ親子旅行。

一早起身，個天灰灰暗暗，而且早上落過雨，唔通連個天都唔鐘意我地?  好!! 無有怕，準備好雨具，向屯門小欖出發!!!

好彩天公又再造美，去到屯門天氣唔錯。

我地既第一站係金海豚廣場。潼潼見好多小朋友企係高台上面影相，佢又話要企上去影。

不過實在太高喇! 唔過十秒已經嚇到喊哂口。

再學下人玩掌上壓先

係金海豚廣場打個轉之後就黎燒烤場BBQ喇! 咪以為潼潼好威水識自己燒野食，佢燒完呢兩條腸之後就收工咯!

燒烤場附近有個簡陋又殘舊既遊樂設施，不過我就好欣賞佢呢個「滑梯」。佢其實只得兩條桿支持兩條腿然後滑落去。我覺得可以訓練小朋友膽量同埋平衡。

潼潼初初玩都驚到係咁叫，要人扶，不過玩左一兩次後就唔怕喇!

可惜除左呢度之外，我從來無見過呢種滑梯，如果唔係真係想同潼潼再去玩下咁特別既滑梯。

身份調換

唉...... 我而家成日俾潼潼訓話，就黎我似做囡多過佢。

呢日潼潼學校開生日會，拎左一個萬花筒玩具番黎。我拎黎睇下。

潼潼:：「你都無問我，你問我玩唔玩得先。」

唉．．．．．．．　又黎．．．．．．

潼潼媽問完拎黎玩左陣。

潼潼：「玩完玩具要唔要洗手呀？」

呢個好習慣黎既，我附和佢一齊去洗手。洗完手我又手多多拎番個萬花筒望一陣，然後俾番潼潼。

潼潼：「你擺番好丫！」

正以為潼潼指我做野．．．　不過又真係我自己拎黎玩，係咪應該自己擺番好呢？

潼潼:：「我洗左手唔掂呢個。」

原來如此．．．．

潼潼媽：「咁擺邊度呀？」

潼潼：「擺係檯上面丫！」

姐姐切好生果拎過黎

潼潼：「玩完玩具食野要洗手喎！」

潼潼媽明知衰左亦死撐：「洗左囉！」

潼潼：「但係你頭先掂左呢個喎！」

潼潼媽：「唔緊要啦！」（差點就想搬出「我係大人唔怕」既歪理）

潼潼:：「唔得架！掂完玩具要洗手啊，有細菌架嘛！」

潼潼好努力搬出「細菌」呢個詞語，講時有點結巴，證明佢只係剛剛學會呢個詞，仲未係好熟悉。

潼潼媽：「唉！！！！」好無奈地入去隨便地洗左手就出黎食生果。

 

極度挫敗

呢排潼潼好鐘意喊，好易喊，少少事唔稱心就喊。

呢日同潼潼行街，潼潼話想去冒險樂園玩。我叫佢打電話問爸爸，然後我都同爸爸傾左幾句，都打算同佢去。點知到我問佢潼潼點同佢講果陣，佢就已經雙眼紅哂，然後喊左出黎。

呢排佢成日喊，我已經話左佢好多次。有乜野事只需要講，唔駛喊。但係唔知點解呢排咁鐘意用喊去表達自己既不滿情緒。於是我決定唔帶潼潼去冒險樂園玩。潼潼就一直扭計，就算我拖佢埋一邊同佢傾，佢都係咁繼續扭計。佢一直係度吵吵鬧鬧，我唯有同姐姐一人一邊拖住佢隻手將佢拖番屋企。

佢一路上係度大叫大喊。我從來無諗過呢D情況會係我身上發生。

我真係好嬲，自言自語 :「你竟然夠膽咁樣係街度嘈，緊係我好耐無教訓你 !」

行到番屋企都一直係咁吵鬧，真係好失禮。去到電梯大堂，潼潼仲居然喊住咁話 : 「唔該 ...... 嗚................ 教訓我丫............ 嗚....... 唔該......」唉! 真係唔知好嬲定好笑。究竟潼潼明唔明白咩叫「教訓」呢?

番到屋企，其實我真係好有衝動想打佢，不過最後都無咁做，只有繼續訓話。呢個時候潼潼又出招 : 「嗚~~~ 收唔到聲........ 點算好呀??? 」唉.... 講到好似好無辜咁。 

最後都唯有同佢解釋番宣洩情緒既正確方法，仲俾左盒紙巾俾佢。用黎抹眼淚嗎?唔係! 係俾佢搣。佢初初都無理到盒紙巾，不過同佢講講下，佢又喊，呢個時候佢真係識拎紙巾出黎搣。唔知咁樣係咪真係幫到佢宣洩情緒呢?而我亦再重申，我唔會接受「喊」呢個做法，如果佢下次再係咁喊，我一定會即刻同佢走。

希望潼潼真係明白啦 !

 

後話 : 之後幾日，潼潼每有想喊，雙眼通紅，即使已經滴出眼淚，但仍未喊出聲既時候，我都會讚佢做得好，忍住唔喊。佢聽到又會更加努力忍住唔喊。然後再鼓勵佢講出佢既想法。情況好似好轉左一點。

國慶日，維修日

呢日係國慶假期。其實我地一家都無乜心思，假期永遠無乜節目安排，就係隨隨便便的過 (假期要爸爸早起實在有點難度)。

今早當我懶洋洋咁賴在床上既時候，發現天花上既燈有一邊鬆脫跌左落黎。嘩~~ 好危險啊！即係吵醒爸爸起身整啦！原來天花燈中兩粒縲絲太短，鑽孔亦唔深，所以經年後就鬆脫落黎。正當爸爸努力嘗試將燈安裝好既時候，嫲嫲就打電話黎，話屋企部電腦壞左而有趕用。最後爸爸都要拆左盞燈落黎，然後又趕入沙田拎部電腦去整，順便同嫲嫲去飲茶。

潼潼嘛？就只有係嫲嫲家樓下既公園仔玩一陣啦！