遲來的夏水禮

因為幫潼潼報左名參加舞蹈比賽及表演，所以暑假以黎都忙個不停，每到假日就要番舞蹈學校綵排，甚至乎同一日上午去一次﹑下午又再去一次，攪到無哂時間同潼潼去玩。查實潼潼媽無諗過學校真係會為小朋友補咁多堂架! 有少少後悔添。

完左個舞蹈比賽，終於可以抖一抖，呢個星期日帶左潼潼去沙灘玩。

潼潼一直怕沙，為左吸引潼潼去沙灘玩，爸爸一早買左新水泡同沙灘波俾潼潼，等佢可以帶埋去沙灘玩。

約五點鐘，到達我地既目的地 - 清水灣。最初潼潼去到沙灘都有d驚，不過可能俾足心理準備佢，而且已經大個囡，所以佢都勇敢地嘗試赤腳踏足沙灘。終於成功.............. 用碎步係沙地上走。 玩左一陣沙就提議潼潼帶埋水泡去游水喇！嘩~ 一去無回頭，潼潼落到水竟然開心到唔捨得番黎，潼潼媽係沙灘上呆等。

因為我地怕曬而遲出發，所以可以玩水既時間都唔長。到六點多鐘要上岸喇! 只有同潼潼係沙灘上掘個大水池。爸爸亦乘機叫潼潼幫忙去不水，等佢有多d機會習慣係沙地上走。潼潼有得玩果然中計，係海邊同沙地上來來回回地走。

到七點鐘左右我地離開喇! 可以令潼潼享受到玩沙玩水既樂趣，算係一個收獲喇! 不過潼潼仍然話比較喜歡泳池呢!