得到舅父相贈海洋公園門券,呢日可以免費同潼潼黎玩咯!
去年同潼潼搭海洋列車時,潼潼嚇到喊。今次再去,同佢做足心理輔導,總算成功過渡。
雖然呢個多星期都係天陰有雨,但係天氣依然翳焗,潼潼媽好快就熱到無哂電,無乜同潼潼影相。
加上潼潼呢排脾氣真係好差,遊玩期間大發小姐脾氣,俾爸爸教訓完一輪之後(仲要俾人睇住潼潼當場大喊大叫,真失禮),爸爸同潼潼預先約定,再發脾氣就唔玩 - 即走!!!!!
之後去到威威天地(兒童樂園)時,因為我無帶備多套衫而令潼潼無得玩水戰遊戲,大小姐又發脾氣。就係咁咩遊戲都未玩,就咁結束左我地海洋公園之旅。
大小姐可能知道自己衰左,又可能因為佢都好攰,知道無得玩之後亦無點扭計,而爸爸媽媽亦都無需勞氣,因為呢個結果係一早約定既,大家就好和平咁執拾離開。呢個的確係一個唔錯既處理手法,不過我諗可能係因為門票唔駛錢,我地先可以咁樣豁出去。
臨走時潼潼媽無奈地:「我隻蛋呀.....」哈哈~ 潼潼爸一時間都轉唔切,我係因為未去新建既蛋形海洋館而感到可惜呢!唉.. 都無辦法喇... 我要陪阿囡齊齊受罰咯!鬼叫自己教囡無方咩!
點解而家 d 小朋友咁惡既呢~~~?
回覆刪除[版主回覆07/27/2011 01:14:00]我都真係唔明點解佢會惡成咁,有時令人頭痛,有時令人沮喪。
相信有媽媽妳的堅持( 如一齊受罰~~),慢慢潼潼會愈來愈有進步!加加油!
回覆刪除[版主回覆07/27/2011 01:15:00]雖然睇不少育兒書,但幾乎無哂辦法。好希望可以快D過渡呢個階段。