潼潼媽我平時好少戴眼鏡，最近發覺打電腦時睇野差左，所以配左幅新眼鏡，岩岩趕得切帶埋幅新鏡同潼潼一齊黎睇呢個木偶劇 - 反斗馬戲團。
可能坐得遠，覺得D木偶好細，唔係好知佢地做緊乜，好彩我戴左眼鏡都好少少。我反而鐘意睇間場時候既小丑表演，佢地好攪笑。
睇完木偶戲，貪得意戴住幅眼鏡同潼潼一齊影下相先。
中環大會堂﹑天星碼頭﹑卜公碼頭，係潼潼媽兒時其中一個比較常去既地方。
呢黎度行下，係我地一家人既其中一個假日活動。
好多野都變左，碼頭一帶唔同哂，剩番條行人隧道仲留有從前既古舊感覺。潼潼爸話好彩隧道無得拆，如果唔係就無埋添喇!
黎到皇后像廣場，想起自己細個時係度影過既一幅相，於是就叫潼潼埋位，係同一地方影番一張對照一下。
又到左一年一度去掃書既時候喇！經過幾年既努力，今年掃書掃得比往年冷靜，所以收穫亦唔多。
首先去兒童天地為潼潼掃故事書。今年無好似以往咁「弓」字形咁行成整個會場。除左幾個指定攤位之外，其它都係隨便路過就望望。
一入門口就見到木棉樹出版社既攤位。香港好既兒童讀物既出版社並唔多，晶晶係其中一家，不過D書好貴。而木棉樹既書就係另一間我覺得比較適合小朋友既出版社。米米日記之前已經買過一本俾潼潼喇! 入面內容好簡單，除左故事之外，我覺得比較適合剛學認字既小朋友。平時$35既米米日記，而家同其它指定圖書一齊買$100五本。另外一本「了不起的鼻子」，我覺得內容好好，有75折買左，都係$2X。
之後去左LONGMAN既攤位，買左$100六本(影相時漏左一本)。「小烏龜空中漫遊」同「田鼠搬家」係同一系列圖書既其中兩本，去年書展掃左其它幾本，只剩呢兩本搵唔到。今年潼潼指定要我搵埋呢兩本俾佢。因為$100六本，所以又選左另一系列的四本，希望明年唔駛又補番同系列既其它書啦。
以下呢本書既繁體版潼潼係讀N班時係學校借番黎睇過。屋企有同系列簡體版既另一本書，潼潼每次翻到背面見到呢本書都話要睇。今次書展竟然又係賣大陸書既攤位見到，純粹情誼結，幫潼潼買埋佢。
我自己左買左一本。呢本書係淘本見過，本來都想經淘寶訂，點知係書展見到就直接係書展買，$8X
呢本書都幾厚，係我買過既育兒書藉之中最厚既一本，見佢咁厚，頓時覺得好抵添!
雖然今年買左唔算多書，但係都由放工行到收檔十二點，連晚飯都無食過，真係好攰。果刻真係好想打斷隻腳坐電動輪椅。
得到舅父相贈海洋公園門券，呢日可以免費同潼潼黎玩咯！
去年同潼潼搭海洋列車時，潼潼嚇到喊。今次再去，同佢做足心理輔導，總算成功過渡。
雖然呢個多星期都係天陰有雨，但係天氣依然翳焗，潼潼媽好快就熱到無哂電，無乜同潼潼影相。
加上潼潼呢排脾氣真係好差，遊玩期間大發小姐脾氣，俾爸爸教訓完一輪之後（仲要俾人睇住潼潼當場大喊大叫，真失禮），爸爸同潼潼預先約定，再發脾氣就唔玩 - 即走!!!!!
之後去到威威天地（兒童樂園）時，因為我無帶備多套衫而令潼潼無得玩水戰遊戲，大小姐又發脾氣。就係咁咩遊戲都未玩，就咁結束左我地海洋公園之旅。
大小姐可能知道自己衰左，又可能因為佢都好攰，知道無得玩之後亦無點扭計，而爸爸媽媽亦都無需勞氣，因為呢個結果係一早約定既，大家就好和平咁執拾離開。呢個的確係一個唔錯既處理手法，不過我諗可能係因為門票唔駛錢，我地先可以咁樣豁出去。
臨走時潼潼媽無奈地：「我隻蛋呀．．．．．」哈哈~ 潼潼爸一時間都轉唔切，我係因為未去新建既蛋形海洋館而感到可惜呢！唉．． 都無辦法喇．．． 我要陪阿囡齊齊受罰咯！鬼叫自己教囡無方咩！
最近呢半年，潼潼既脾氣差左好多。脾氣越黎越大﹑人越黎越惡﹑態度越黎越差，真係令到潼潼媽不知點算好。
呢兩日就更加過份，居然動手打爸爸同媽媽。
好細個已經教潼潼唔可以打人，我地更以身作則，教訓潼潼時都唔會打佢。所以一直以黎潼潼都好清楚唔可以打人，佢亦從來都無打人。呢兩日居然分別打過爸爸同媽媽，令到我地好氣憤，好惡咁教訓左潼潼一餐。
今晚睡前除左講故事，亦都好好的再給潼潼教育一番。不過我並無再次係潼潼面前碎碎唸，要話佢既之前都講左好多喇，我反而同佢一齊細數佢今日做得正確﹑值得嘉許既地方。我並唔想潼潼自己都認同自己係一個壞孩子，我要俾佢知道佢係好值得人愛既好孩子啊！
唔知呢個「賞識教育」成效會有幾大，不過睇住熟睡左既潼潼，佢依然係我可愛的女兒！
終於到左潼潼K1散學禮既日子。呢次舉行散學禮既地點係機場富豪酒店。
雖然只係一個小小既散學禮，但學校一D都唔馬虎，仲好有心思添。首先進場前先派給每位家長一個學生既磁鐵，由家長親自在孩子放係田圃上，交由學校好好去培植呢棵幼曲，讓佢地拙助成長。
搵到潼潼嗎?
哈哈~ 咁細幅圖點搵呢? 其實潼潼就係其中一棵小白菜。
之後由一班學生進場，首先係幼兒班﹑低班，最後係高班既畢業生。
高班小朋友既頒授儀式好令人感動，係由父母親自為小朋友逐一戴上四方帽，司儀為家長讀出預先準備好既寄語同祝福。
爸爸斷言到潼潼畢業時我上台的一刻會喊出黎，我都唔否認 。果一刻真係好感動，連司儀都喊左出黎呢!
之後係低班既表演時間喇！
頒發分豬肉大獎，人人有份，永不落空。
潼潼得既操行獎，佢地拎住既封套入面除左有獎狀以外，仲有一張班主任同每一位小朋友獨立既合照。D相影得好自然，D老師都好親切，有D會攬實小朋友，直情好似影樓入面影既家庭照咁呀！
席間仲有遊戲環節，老師會都花左唔少心思喇！要兼顧教學以外咁多工作，真係多謝各位老師！
