除夕 + 生日

潼潼除夕生日的嗎?

非也!! 其實係姐姐生日。不過姐姐都無乜所謂喇! 將揀蛋糕都交左俾潼潼，家中有小朋友就係咁啦!

平凡聖誕節

呢個聖誕無乜節目，連影相都無乜。

12月24日　星期六
本來爸爸想帶潼潼去尖咀影TOY STORY聖誕佈置，不過為左遷就婆婆，變左去MEGABOX。不過去MEGABOX潼潼都開心既，仲第二次玩溜冰，佢已經可以自己慢慢一步一步咁走，不過因為要陪婆婆係附近行，所以好可惜地拍唔到潼潼自己溜冰既情形。

12月25日　星期日
呢晚如往年一樣去表姨屋企開PARTY，本來呢個節目潼潼都好開心架。不過今年有D唔同，表姨媽帶同表姐表弟由外國番黎，佢地表姨兩個小朋友都係操英語，而潼潼卻不懂英語，所以就無辦法一齊玩喇!

12月26日同27日都係公眾假期，不過懶惰既潼潼媽就無乜安排節目。見臨近過農曆年，潼潼去年既衫好多都丟哂，所以就急於幫潼潼入貨，可惜衰妹雖然貪靚卻又對SHOPPING無興趣，所以極度唔合作。假期最後一日既晚上，仲因為扭計被罰企添。因為潼潼既硬性子，同爸爸鬥氣而企超過1個小時，個人因為之前喊過，攰到企係度時中下中下，都唔願意低頭行去爸爸度。唉．．．．呢個囡．．．　真係無佢符。爸爸成日話：「仲硬頸過你呀！」

額外的聖誕假期

今年潼潼既聖誕節假期早放左，但係並唔係咩好事。

事緣係星期日(12月18日)既深夜，潼潼又「如常」地有「生長痛」情況出現 : 一個晚上醒三四次喊腳痛，但呢個情況幾乎已習以為常。到19號星期一既早上叫潼潼起身準備番學既時候，就發覺佢有發燒，又見佢之前一晚訓得唔好，於是幫佢請左假去睇醫生。而學校方面亦提議不如俾潼潼抖兩日，星期三先番學開聖誕慶祝會。

小朋友發燒往往比較反覆。12月20日(星期二)早上，潼潼都有發燒，所以繼續休息。

12月21日星期三早上，同潼潼整妝待發，揀好哂衫諗住著靚靚番學校開PARTY，點知係換衫時發覺潼潼身體出現紅點，而且潼潼亦不斷搔癢。因為擔心佢係出疹，所以無得開PARTY，又要請假睇醫生，醫生話潼潼係敏感。敏感?? 唔係嘛?? 無端端咩敏感先? 我同潼潼爸都對呢個答案好不滿，商量緊係咪應該再帶潼潼去睇呢一個醫生。不過之後聽番D過來人講番，原來好多時小朋友發完燒之後都會引發一D紅疹/濕疹，就係中醫所謂既「熱毒」?既然係咁，唯有再觀察下先。呢晚我較夜先番到屋企，番到去潼潼已經訓左，姐姐話潼潼好耐先訓著，話全身都好痕好辛苦。唉... 聽見都覺得可憐。

12月22日，潼潼番全日班，其實呢日都要番學，不過身上紅疹未見好轉，所以繼續休息。姐姐話潼潼整日都沒神沒氣，睇電視都訓係梳化度，玩又無心機玩，成日都好似好攰咁。潼潼一反常態，真係令人擔心。

12月23日星期五，潼潼媽又係夜番。爸爸放工番黎見潼潼情況未有好轉，所以又帶左潼潼去睇另一個醫生。醫生又係話潼潼敏感。 不過就換左D葯膏。

呢個星期一﹑三﹑五都睇醫生，破哂記錄。今次生長痛﹑發燒，之後出疹，感覺上好似係身體上一連串引發既反應。身痕真係好辛苦，希望潼潼早日康復，下次腳痛後唔好再發燒喇。

屋苑聖誕聯歡2011

去完學校既旅行番黎，正好屋苑舉辦既聖誕聯歡亦接近尾聲。

小朋友真係精力旺盛，以為潼潼會攰，但係潼潼仲係欣喜若狂，岩岩趕得切玩其中一個遊戲 - 跳充氣彈床

之後仲跟媽媽去舊同學既邊爐活動，同佢地囡囡玩到唔捨得走咁滯。阿囡，你係得既!!

遊北潭涌渡假營

呢日參加左潼潼幼稚園家校會既活動 - 遊北潭涌渡假營。

到達目的地之後既第一個活動係集體遊戲



其實d遊戲都幾好玩，好多小朋友都玩得好開心

只係潼潼係度玩性格，獨家村，人地玩到笑呵呵，佢就好似舊雲咁週圍遊，我真係俾佢激死。

係營內午飯之後就係自由活動時間，最初潼潼只肯賴係遊樂場，唔肯去其它地方玩。唔係嘛?! 咁遠黎到剩係玩遊樂場? 咁不如係屋企附近遊樂場玩? 又激死....  之後先tum到佢去玩跳彈床。跳跳扎....岩哂潼潼。

再去玩其它遊樂設施

下面張相叫「強顏歡笑」 其實潼潼驚到不得了，不過仲要笑住咁俾我影相。

我同老師傾緊對潼潼既升學問題既時候，潼潼就同其它小朋友玩肥皂泡

最欣慰係見到潼潼都同其它小朋友玩得埋，而且亦算主動 (減低潼潼媽對獨生女既內疚感)。

繩網陣

早前參加左blogger「鳥龍媽與駁嘴王」既免費活動，可以同潼潼去冒險樂園玩佢地個繩網陣。

活動10點開始，不過要週日咁早出動真係有點難度，所以我地遲左半小時先到達。因為人數所限，去到既時候潼潼已經無份參予佢地既「歷奇」遊戲，加上(我同爸爸懷疑)潼潼怕黑同埋果度d聲效，所以一路嗌住要走，話唔想玩。

一場黎到，緊係唔想就咁走左啦! 好辛苦拖拖拉拉咁先拖到第二節時間開始，可以俾潼潼入去玩。

一開始左就不得了，潼潼玩得好開心。

首先潼潼要係電腦度輸入資料，再揀選問題既難度。


跟住就會問d關於各種動物既問題。

我地就係遊戲區內搵答案 - 嘟完隻動物再去番電腦度嘟一下，就知答案岩定錯，答岩會計分，然後再問下一條題目，再搵答案。
 

 

呢個遊戲考你動物既常識之外，其實都好考你既觀察力同記性。因為遊戲區內每個角落都有唔同小動物，你觀察力好同記性好，就好快可以搵到答案。

呢個活動既另一主角就係繩網。

但係其實我覺得繩網既部份其實唔係咁多。

玩完之後就係附近影下相。睇下潼潼，連影相都拎住張遊戲卡呢!
 

睇冰雕

去旅行睇冰雕? 非也!!! 呢個只係商場聖誕節既活動，只要購物滿二百蚊就可以兩個人入「雪櫃」睇冰雕。

排隊入雪櫃既人好多，仲有d人係特登shopping然後入去。排隊差唔多1個小時，入去唔夠1分鐘就番出黎。係咪物有所值真係見仁見智，只不過竟然阿囡想入去睇，就唯有派爸爸「捨命陪君子」喇!

商場聖誕佈置2011

因為要交相俾學校做佈置，所以特登出街食飯，然後同潼潼去商場影相。

呢晚潼潼影相幾乎雪糕不離手，真係俾佢激死。

初勝魔力橋

呢個潼潼媽係咪傻左呀? 玩遊戲贏左都要寫?

係呀~ 呢個遊戲對於潼潼黎講唔易架! 最初我地都係簡化個遊戲玩法俾佢玩，然後慢慢增加個難度。而且潼潼係個好怕輸既小朋友，呢個遊戲就可以俾佢學習接受挫敗之餘，亦希望可以增強佢自信心。

今日潼潼終於可以一嘗勝利既滋味，仲開心到大叫：「媽咪，我終於贏左喇！！」

第一面獎牌

呢日係潼潼學校既舉行運動會既日子



比賽項目只有一項: 四十米賽跑
起跑喇!! 努力!! 加油!! 努力!! 加油!!

賽前話要跑第一既潼潼，最後奪得銅獎。

其實係每場賽事跑八條線分冠亞季軍，所以得獎機會係八分三。真係好易中，好易買餐餸。
ANYWAY，潼潼得到獎我地都好開心既。

賽事之後仲有遊戲玩添!

寫數字

最初睇到潼潼寫數字寫到咁...真係無言........



不過之後又覺得都幾好丫，起碼佢肯自己寫。都值得嘉許呀!  (呢個阿媽真係夠阿Q )

五歲的迷思

以下內容係潼潼媽既面書寫過，不過都想係潼潼BLOG度記錄番。

潼潼三歲時，問我地幾多歲。
潼潼：「姐姐幾多歲?」
潼潼媽：「四歲!」
潼潼：「媽咪幾多歲?」
潼潼媽：「五歲!」
潼潼：「五歲就生bb呀?」
潼潼媽：「係呀!」
今日............
潼潼：「12月姐姐生日之後就到我生日喇!」
潼潼媽：「係呀! 你生日就係媽咪肚好痛好痛生你果日」
潼潼：「你果日肚痛生左我? 我就快五歲喇，我五歲可能會生BB」

另日：
爸爸：「潼潼五歲生日喇喎！係咪可以生BB呀？」
潼潼：「都可以嘅！唔通一百歲先生咩？」

姐姐仲同我講，潼潼話要生個BB，第日要同佢一齊番學添。

數學精英選拔賽

收到學校既通告，其中一份係某小學舉辦既「幼稚園數學精英選拔賽」參加表格。其實一直以黎潼潼媽都無特別訓練過潼潼，好肯定潼潼一定唔會係精英啦！不過見後面有ｄ模擬題目，又俾潼潼試下先。

果然，好快已經被KO左喇!

不過呢個比賽係俾K2同K3既小朋友參加，真係有需要識得咁深既加﹑減數嗎?

本來我都有考慮俾潼潼參加當玩下，不過已經被爸爸潑左冷水。算啦~ 潼潼媽都係唔好攪攪陣無幫襯喇!

溜冰

潼潼第一次溜冰，老實講，又再一次顯示俾我睇，佢比我強，因為有咁既勇氣去做，潼潼媽真係自愧不如。


其實以第一次溜冰，我覺得佢玩得唔錯，最緊要ENJOY。諗住佢有咁既興趣，都想試下俾佢學，唔係要玩得好叻，不過只係想佢識。

佢玩左一段時間，番黎綁過鞋帶後，我問佢要唔要休息下，佢都話唔洗，要再出去玩。不過再玩多陣，到走果陣佢表現得有點疲累，仲竟然話唔再玩喇 !

好可惜.... 唯有暫時停一停! 等佢再有興趣時先再試過啦!

教師發展日 - 充實的一天

 

今日雖然係星期五，不過係潼潼學校既教師發展日，停課一天，所以我同爸爸都請左日假一齊出去玩。

呢日既節目好豐富呀! 首先早上我同爸爸去左睇一部近期大熱既電影 - 那些年，我們一起追的女孩。



好多70後睇完呢套戲都話好有共鳴。好可惜，潼潼媽既「青春」唔係中學階段，雖則覺得呢套戲好睇，不過就唔可以係呢套戲入面搵番昔日既青春喇!

之後就會合潼潼一齊去MEGABOX喇! 做乜野? 溜冰呀!

其實之前潼潼去MEGABOX見到人地溜冰果陣都話想玩架! 不過俾爸爸潑左冷水，所以即時打左退堂鼓。點解岩岩對上個星期日去MEGABOX行街時，潼潼又話想玩，不過我地見果日衣著單薄，又無帶外套，所以只係應承下次黎MEGABOX就去溜冰。

今次去溜冰，潼潼媽對潼潼預先做哂心理輔導，希望佢可以好好享受呢次既活動。



玩完溜冰，諗住潼潼都攰啦，點知佢仲要落IKEA玩波波池。玩完波波池再去行豬豬島，仲係SUPERMARKET同「12蚊」店買左好多零食添。

最後食埋晚餐就走! 本來係邊度食晚餐上我同潼潼有D爭拗，最後潼潼都遷就左媽ME，同我去左我好鍾意，但又好耐無去既DELIFRACE食包包晚餐。嘩!!!
 真係好滿足又充實既一日呀!!!!!