K1面試 - 救世軍明德

12月5日 星期六

呢日潼潼要去救世軍明德幼稚園面試。呢一間幼稚園係區內名氣好大，收生全靠口脾，不用宣傳，聽聞已交表排隊等候入學既小朋友已接近800名。

去到呢間學校，老師好友善咁指示我地去洗手間同小朋友洗手，然後就進入班房老師指示潼潼可以拎玩具玩。由於潼潼已經番緊學前班，已懂得拎玩具既規矩 - 走到玩具架前將整籃既玩具拎出放係自己個位上，先再坐低玩玩具。期間老師走埋黎同潼潼打招呼，潼潼亦有對老師講早晨。然後老師過黎同潼潼一齊玩玩具，大家好似老朋友咁，有傾有講。(當然，老師其實係度考緊潼潼。)

潼潼玩玩下，又話要玩其它玩具。佢就聽從老師指示，先收拾好玩具，再拍好凳仔，然後將整籃玩具放回架上，再拎另一籃玩具。潼潼好多心，不斷咁換玩具，不過每次都好自動自覺咁先拍好凳，再將每一籃都放好，然後先拎玩具。

整個過程好順利，老師稱讚潼潼小肌肉發展唔錯，講野好叻，(呢點其實我唔係好認同 ) 亦欣賞佢離位時識拍好凳仔。

之後就係考潼潼媽既時候喇！

連埋我，一共有兩個家庭要進入另一個房間見校長。今日爸爸要上班，就只得潼潼媽一個應戰。

校長首先要我地講下係乜野吸引我地報讀佢地既學校，對學校有咩期望。我見另一位媽媽都係無乜反應，唯有先開口。

潼潼媽：「最初都係靠口脾，後黎都了解過你地間學校，著重訓練小朋友自理能力．．．．．　行蒙特梳利．．．．．．　讓小朋友獨立思考，自我探索．．．．．　」（咁多"..........." 係連我自己都唔係好記得自己講過D乜)

到另一位媽媽講，唔知果位媽媽係咪講錯左D乜（唯一肯定係佢將「蒙特梳利」講錯為「蒙特利梳」），抑或係因為校長唔喜歡佢無黎過學校既開放日，就係咁問左果位媽媽好多好多問題，又問佢了解學校幾多，又問佢小朋友發脾氣會點做，問左好多好多，問到潼潼媽心裡都有點慌，盤算緊自己到時應該如何回答。但係又奇怪，校長再問我果陣又只係一句起兩句止，仲好滿意咁對我微笑。

另一方面，潼潼又出奇地合作。因為係校長同家長對話既時候，小朋友亦要坐係度，但係就無任何玩具，只係坐係旁邊等。當另一位小朋友係度扭計既時候，潼潼就由頭到尾都好乖咁靜靜坐係度。所以當我地完成整過面談之後，校長亦讚賞潼潼。

整個面試就咁結束左。

雖然潼潼媽已經俾左青衣商會既留位費，不過去完救世軍明德之後，見到學校對每一個小朋友既面試都咁認真，又心多多唔知邊間好．．．．．．

總括而言，比較兩間學校，我覺得青衣商會係學術成績上會比較優勝，而救世軍明德係比較注重小朋友個人能力及品行既培養。應該點抉擇呢？

點都好啦！都係要等面試結果先再決定。

 

（P.S. 雖然潼潼已經再無發燒，不過依然咳同有鼻水，繼續做喝睡寶寶。）