潼潼病倒了

其實潼潼呢個多星期都有鼻水同咳，不過我唔想佢食咁多西藥，見佢無乜其它問題，就無帶佢睇醫生，希望佢可以好似之幾次咁，靠自己既抵抗力康復。但係星期一晚，潼潼發燒。

12月1日 星期二

呢日同潼潼睇完醫生先番工，雖然潼潼有燒，但係一直都依然精神活躍。不過到我放工番屋企既時候，就見潼潼已經好「支力」咁訓左係廳，叫醒佢食左少少飯，然後佢就好自動自覺咁拉我入房講故事，好快就訓左喇！

之後我係廳用緊電腦之際，突然聽到潼潼係房大叫「媽媽!」。入到房見潼潼坐左係床度，佢見到我番入房又好安心咁拖住我隻手繼續訓。

我拖住潼潼隻小手，心裡面想，我要好好記住呢種感覺。

12月2日 星期三

凌晨五點幾果陣幫潼潼探熱有103度多，即刻俾佢食退燒藥先再訓。不過到早上七點半起身時，仍然有102度，繼續替佢請假唔番學。

本來今日係我同潼潼爸結婚六週年紀念，雖然潼潼病左唔可以出街食飯，但係我都買左個蛋糕仔諗住大家食蛋糕開心下。

不過潼潼繼續好似喝睡咁，放工番屋企見到佢又係o係廳訓緊，勉強叫醒佢食少少野，食完葯，佢又自己番入房訓覺。今晚，潼潼未夠八點半就已經訓著左，真係破哂記錄。我地見咁樣，連蛋糕都無切，留番聽日「慶祝」啦!

訓到深夜，聽到潼潼係咁咳，咳得好厲害。我入房抱起潼潼俾佢直著身子訓，慢慢佢呼吸暢順左，咳亦都少左。我抱住潼潼，想起佢BB既時候，有點懷念，見佢訓得甜，幾乎唔捨得將佢放低。

12月3日 星期四

今朝訓醒果陣幫潼潼探熱竟然有104.5度，嚇死我!不過好彩可能只係因為訓覺蓋被焗住既關係。佢起身之後散咁d熱，又跌番去101度。

夜晚見到潼潼又係訓覺，叫極都唔願起身，後黎見我地拎個蛋糕出黎，先稍為精神D。於是我地一齊同潼潼唱歌，吹蠟燭，切蛋糕。

潼潼似乎因為自己會吹蠟燭﹑切蛋糕同食哂蛋糕而表現得好興奮。

12月4日 星期五

今日俾潼潼番番學！不過我無俾佢番全日，等佢多D休息。

夜晚潼潼媽放工番到屋企時潼潼已經訓左喇！見到姐姐，姐姐話：「潼潼點解變成咁架？」

姐姐話，今日潼潼兩點半開始訓覺，訓到六點幾都唔願起身，到七點半夾硬叫醒佢，但係佢係咁發脾氣，係咁喊話要訓覺，訓到眼都腫哂。之後潼潼見姐姐拎左蒸水蛋同多春魚出黎，先起身話要食飯。食完飯之後，姐姐幫潼潼沖涼﹑食藥。之後潼潼又自己行番入房。

姐姐問：潼潼，你去邊啊？

潼潼：我要訓覺呀！

姐姐幫潼潼蓋好被，轉頭佢已經又訓著左。

咁既情況的確好反常。過去潼潼就算病都只係食完藥後眼訓，其餘時間都精神。而唔會好似咁成日都訓。

只有希望潼潼係爭取多D休息時間後會快D好番啦！