Crying In The Party

12月24日下午去左老闆屋企慶祝聖誔，期間落左clubhouse度卡拉ok，同事揀左呢首歌。

呢首歌係聽過，但係就無乜印象，甚至睇見歌名唔會記起係咩歌。不過果日聽到呢首歌，卻被歌詞打動了。尤其當唱到「或有一天當你大了，城府開始深了。年輕的眼淚流光了 便掛念曾經這樣了。」歌詞所描述的，就跟過往發生過的幾乎一模一樣，令潼潼媽對呢首歌很有共鳴。

被感動了！是因為「一發現已經成熟了」嗎?

陳奕迅

曲: 黎小田 詞: 黃偉文

熱播的歌 忽爾靜了 場邊 一聲慘叫
好友都靠近了 你沒有被忘掉
觀眾 預了分擔惡兆

大喝三杯 失控地笑 孩子 終於哭了
空氣的震盪裡 你沒說但心照
某個事情大概 不妙了

*因一個人痛哭 哭崩派對舞曲
我也曾像這樣 青春大概相似
總有段情 落入這種 困局*

或有一天 當你大了 城府 開始深了
年輕的眼淚流光了 便掛念曾經這樣了

讓你哭泣 哭到倦了 重整 呼吸心跳
哭過吵過鬧過 你為愛做足了
再接下來就要 收拾了

repeat*

或有一天 當你大了 城府 開始深了
年輕的眼淚\流光了 便掛念曾經這樣了

是 所有熱情 會乾掉
一發現已經 成熟了

生左喇!出世喇!

過完個聖誕節假番公司，孔雀魚媽媽終於生左魚BB喇！

一共三十多條呢！

潼潼媽當然無本事養到D魚識生BB啦！只係好取巧咁買D已經大左肚既孔雀魚番黎養唶！

夢話 / 傻豬

之前試過聽到潼潼訓訓下覺唱歌仔 - 晴雨歌最尾一句：回到XX幼稚園。覺得好攪笑。

尋晚又聽到潼潼說夢話，仲講得好清楚添：

「唔得架喇！果個夾唔到架喇！」

個衰妹而家差唔多日日都落樓下鋪頭仔玩果部一蚊一次既夾公仔機，玩到連發夢都掛住夾公仔。

********************************************

同潼潼沖涼洗頭之後幫佢梳番好過頭。

潼潼：「唔係呀！把梳你架，傻豬！」

潼潼：「傻豬媽！」

聖誕快樂2009

今日先有時間同潼潼慶祝聖誕。首先係聖誕大餐 - 去食壽司。

跟住去淘大商場，主要係媽媽想為潼潼添新衣。但係潼潼就無乜興趣，除左佢自己揀左一件媽媽唔太喜歡既紅色狗狗衫外，每當我係度睇衫既時候，佢都叫住「唔洗呀！有喇！」咁樣算唔算叫做慳家呢？

潼潼最大興趣係冒險樂園，又係果度玩左陣。

之後行去德福食野兼影相。不過實在太多人，而且潼潼唔多合作，所以都好難先影到靚相。我地既奇招，係抱潼潼入去本身不得進入既場景入面拍攝。（我地都只係有樣學樣唶）

今年德福有個小玩意，就係佢有四個主要拍攝景點。每到一個景點都有可以係果度蓋一個印章，集齊四個印仔就可以去換心意咭。

潼潼好鐘意玩「給印仔」，所以好踴躍去每一個拍攝地，但係就唔多願影相。去到最後一個景點，睇下潼潼影相時既表情就知佢有幾咁唔情地俾我影相。

今日潼潼媽一共為潼潼買左五件新衫，行街時又碰到表叔，再呃多左表叔同姨婆送左一個公仔同埋一包餅餅。潼潼今日可算大豐收喇！

洗手

今日潼潼自行完成左洗手既程序。

唔好睇少洗手這一回事。潼潼首先要將褶椅搬到洗手間，小心打開，放好，然後爬上椅上，拉高衫袖，開水喉，控制水量(平時都叫潼潼開水不用太猛)，沖水，抹洗手液，清潔雙手(要搓手及用手指抓手掌才算合格)，抹手，小心從褶椅番落黎，收褶椅，將褶椅放回原處。

潼潼都一一做好了，潼潼媽還給潼潼錄了短片。當然，其它人是沒興趣的了，所以沒有放上來。

潼潼快3歲了，希望佢係自理能力方面可以做得更好，盡量讓佢多嘗試。而家潼潼已經嘗試過(未成功)扭毛巾同褶被子了。

不過洗手嘛？暫時仍要小心睇住佢，始終要爬高爬低有點危險。

分柑同味

之前都提過潼潼以前好肯同其它人分享食物，但係唔知咩原因，最近就好獨食，無論點樣哄﹑點樣講道理，佢都唔肯同你分佢自己既食物。

今日潼潼媽食緊柑既時候，潼潼見到又話要食，我就把握時機。

「潼潼想食柑呀？好丫！我地一齊食丫。」

「係咪好好味呀？我地分享，一齊食好開心喎！」

潼潼食完我分俾佢既柑都未夠，再問我要左一個。呢個時候我問潼潼可唔可以分D俾我，潼潼好樂意咁分左幾件俾我。成功左！

食完一個佢又話要，我怕佢食太多，今次叫佢同姐姐一齊分一個柑。

潼潼：「姐姐！我地分享呀！！」

好好！與其說教，還不及身教來得簡單及湊效。

 

工展會2009

第一次帶埋潼潼去工展會，仲有嫲嫲同行。

其實工展會真係唔適合小朋友，由頭到尾都係買野，佢地會好悶。不過諗唔到D咩節目，咁都叫做無節目之中既節目啦！

潼潼全晚幾乎用「呆」同「扭計」黎形容，不過真係唔怪得佢，不竟呢個節目唔係由小朋友出發。

期間買左個「銅鑼燒」，潼潼好鐘意食，食到最尾仲叫我唔好食添呀！呢排都係咁，有鐘意食既野就霸住哂唔肯分俾人，認真唔要得。食完野之後，潼潼醒神番少少。而我亦不時抱住佢同佢玩，要不斷逗佢笑。

差唔多臨走時見到呢隻馬仔，玩左一陣，又開心番D。

心情好既時候無端端企係度叫我幫佢影相。

行完工展會，去到皇室堡又影下相先。

遇岩自己鐘意既話，佢會好自動自覺擺甫士俾我影相呢!

最後去翡翠明珠果邊食飯，餐廳呢套專為小朋友而設既餐具好可愛呢!潼潼亦好認真係睇餐牌。

呢餐潼潼都好乖咁食哂野，仲食得算幾多添！俾個叻你啦！

屋苑的聖誕聯歡

屋苑每年都有聖誕聯歡會，而最受小朋友歡迎莫過於呢個彈彈床。潼潼上年未夠兩歲都已經上去玩過，不過玩左無耐就俾其它小朋友撞到而走番落黎。今年終於可以由頭玩到尾。

好可惜只係玩左一次，跟住就要出街。番到黎剛好收場，連其它攤位遊戲都無玩過。又要等下一年喇！

機械人

潼潼話自己係機械人。

其實潼潼細細個已經好鐘意用個箱「粒」住自己。

http://hk.myblog.yahoo.com/jw!JFqpQSmfER5kzK5KrxXGmQNjZQ--/article?mid=1751

http://hk.myblog.yahoo.com/jw!JFqpQSmfER5kzK5KrxXGmQNjZQ--/article?mid=1793

http://hk.myblog.yahoo.com/jw!JFqpQSmfER5kzK5KrxXGmQNjZQ--/article?mid=1855

http://hk.myblog.yahoo.com/jw!JFqpQSmfER5kzK5KrxXGmQNjZQ--/article?mid=1964

 

聖誕襪

話明聖誕襪，緊係要著係腳上面啦！

嫌未夠古怪嗎？

做動作，分左右

又係迪迪尼洗腦世界既時候。 可惜開左伴唱版，音樂比較細聲同埋聽唔到內容。

潼潼，你個打筋斗實在求其左D喎......

數的概念 及 問句

2009年12月15日 - 數的概念

爸爸要求潼潼食飯要有3個叻：

1. 要坐定定食飯


2. 自己「不」飯食


3. 要食哂飯

上個星期潼潼總係餐餐食剩飯，激到爸爸死。不過今個星期唔知點解，連續三日都好乖自己食哂飯。

呢日番到屋企，潼潼第一時間話我知：「我食哂飯喇！」我就緊係要讚下佢啦！

潼潼都好滿意自己既成績，之後又自言自語：「5個叻唔叻，3個叻先叻！」

其實潼潼已經開始識得數數，有時甚至同我地講數，我地話「玩多3分鐘。」佢就會話「玩多5分鐘丫。」

唔明點解會「3個叻」叻過「5個叻」呢！

*************************************************

2009年12月16日 - 問句

小朋友兩歲開始應該喜歡問「what」，呢樣咩黎架，果樣咩黎架，不過潼潼好似就近期先開始比較問得多左。

今晚幫潼潼蓋一張平時比較少用既厚被，潼潼話果張唔係被。

我：呢張係姨媽買俾你既被丫嘛！

潼潼聽到之後表現得驚訝同開心，可能無諗過係姨媽送。

之後潼潼又明知故問：張被邊個(who)買架？

我（故意）：唔知呢！

潼潼：係咪姨媽買架？

我：係呀！

潼潼：係邊度(where)買架？

我：．．．．．　（正諗緊點答，佢會唔會明）

潼潼：係咪商場買架？

我：係呀！（估唔到潼潼識用「商場」呢個名詞）

原來潼潼已經學識同理解「what」,「who」同「where」，潼潼媽期待「why」既出現。識得問「why」既時候，就代表你真係大個囡，懂得思考喇！

 

　

 

聖誕樹

這是我們的聖誕樹，潼潼都有份佈置，只不過等佢訓左之後俾我地改頭換面。

聖誕留影2009

臨近聖誕，到處都充滿聖誕氣氛

@厚德商場

@杏花村商場

@康山吉之島

@康怡廣場

學習擺甫士

 

平時不太喜歡讓潼潼睇電視，不過近排會俾潼潼睇逢星期六早上十時半做既卡通片「花漾明星」。因為每逢播放片尾曲既時候，潼潼都會學著裡面既女主角 - 偶像派歌星擺出各種甫士，睇見佢真係好攪笑。

老師的話

潼潼媽每星期都好期待逢星期五潼潼學校派番黎既手冊，因為入面有每週既學習報告。

除此之外，手冊入面仲有「老師的話」及「家長心聲」可以自由填寫。今個星期既「老師的話」，潼潼媽一睇見就哈哈大笑。

看完了「老師的話」，潼潼媽亦不甘示弱，即刻引導潼潼對我說：「我都好鐘意您呀！」

今年的十二月....

本來係好開心既十二月... 本來充滿節日氣氛既十二月...... 今年的聖誕... 除夕.... 都再無意義。雖然我明白一切並非人願，不能怨，但總有點點失望同唔開心。

尋日聽到一個壞消息，老公的二十三歲的表弟跳樓喪生了。老公當然好唔開心，今晚本來打算帶潼潼一齊出外影相，但節目取消了。而表弟的白事亦將於廿四日設靈，廿五日上山。這兩天............

十二月卅一日，朋友結婚設宴，雖然替佢開心，但要千里迢迢的入屯門飲宴，亦要係大除夕的晚上丟低潼潼係屋企.......

兩個歡愉的日子都就此沒有了。