今日潼潼媽同潼潼爸都放假，所以帶埋潼潼一齊去公園玩。
呢日天氣好熱呀! 潼潼玩到一頭汗。
正如PLAYGROUP既導師鍾SIR所講，潼潼係活動力好強既小朋友，絕對喜歡周圍爬周圍走。
基本上自己上樓梯﹑玩滑梯係無問題，只係我地大人唔放心都會跟住佢。
睇下！學人玩單桿，仲懶醒咁要做俾爸爸睇。
最後送上懶可愛相片一張。
2009年2月24日 星期二
2009年2月22日 星期日
超級寶寶學堂
潼潼已經完成左一期既超級寶寶學堂，睇住潼潼既進步，潼潼媽當然會俾潼潼繼續啦。
早前鍾SIR派左份問卷係關於小朋友既日常生活情況，今日就派番份分析結果俾我地。佢話潼潼既活動能力好強，專注力卻一般，兩樣加起上黎就係無時停，坐唔定，可以介定為「活潑型」。鍾SIR一再強調，潼潼只係「活潑」，唔叫「活躍」，好彩唶
。鍾SIR話由於潼潼係咁「活潑」，所以我地亦都唔可以勉強佢長時間坐定定上堂，係適當既時候由得佢跑個圈番黎
，然後先再繼續課堂。 另外潼潼既適應能力都算幾高，所以潼潼係PLAYGROUP既表現亦係咁越見進步。不過亦都指出潼潼既情緒表現都好強，會好容易唔開心，又好容易會開心番，鍾SIR話佢唔開心既時候就要TUM番佢，仲話情緒係無得改，我地只可以接受同埋作出調節 
。
好喇！講番潼潼今堂既表現。雖然都係有D時候要走黎走去，無端端自己跑一個圈先又走番黎，但係各樣活動都叫有正確既表現。今日除左平時既聽指令訓練﹑郁下手仔腳仔﹑學習忍耐等等活動以外，鍾SIR同大家做既小運動係將小朋友左右拋起，仲要係有一小段既時間被凌空拋起。潼潼玩呢個遊戲係毫無懼色，不過鍾SIR又再次話潼潼D骨太幼，叫我地平時唔好自己係屋企同佢玩。仲有就係滾乒乓波，叫小朋友用個膠杯「吸」番住個波。最後就係踢球遊戲，最初潼潼都唔熱衷，但係好快就玩到卡卡笑。
好快又過左一個鐘，潼潼係堂上表現越黎越出色，我地就越黎越可以ENJOY一下上堂既樂趣啦！
2009年2月21日 星期六
2009年2月16日 星期一
戒啜手指
潼潼幾乎由出生第一天便會啜手指。最初媽媽依循書本所講，認為啜手指係嬰孩對周遭事物既探索，所以無刻意制止。就係因為咁，潼潼到好大個都仲係成日啜手指。為著衛生問題，同埋唔想佢咁大個仲啜手指咁難睇，我地都試過話潼潼，唔俾佢啜手指，但可能我地唔夠精極，又可能潼潼啜手指癮太深，甚至乎訓覺唔啜手指訓唔著，所以一直未能戒掉啜手指既習慣。
呢一兩個月，我地發覺潼潼比以前少左啜手指。一般情況下只係訓覺既時候先會啜。可能係因為我地成日話佢知啜手指攪到手指好醜怪 (確實姆指已結繭同甩皮) / 好臭，所以佢都知道唔好啜手指。
今晚陪潼潼訓覺既時候．．．
潼潼媽問：食唔食手指？
潼潼：唔食！
跟住我一直睇住潼潼訓，潼潼真係試過好幾次將手放係咀側邊，但係又無放落口，又時我定睇望住佢，佢又即刻放開隻手。
潼潼媽係呢個時候誇讚幾句：潼潼好叻喎！好忍耐，唔食手！
潼潼雖然手係咀巴側邊不斷徘徊，但係亦然忍耐住。我唔想俾太大壓力潼潼，於是同潼潼講叫佢乖乖自己訓，唔啜手指，媽媽一陣番入黎睇佢。潼潼答應左。
我出廳一陣，大約五分鐘不夠番入房，見潼潼已經訓著左，而且無啜手指。潼潼媽好開心，潼潼既表現又再次證明佢係大個女喇，自己學識忍耐，唔駛我地督促佢都會自己戒啜手指！
2009年2月15日 星期日
超級寶寶教室 - 第四堂
越黎越喜歡帶潼潼番教室，唔係因為潼潼學識好多野，甚至乎我講唔出潼潼係堂上做過/學過d乜野，不過好開心見到佢每次都有進步。
呢日潼潼係唱「MY BONNIE」既時候已經會自己坐定定係度做動作：用一雙手緊抱住自己，同埋將手放係前面做「BRING BACK」既動作；唱運動歌既時候會舉手同埋雙手叉腰扭腰。不過有D時候，潼潼都仲係鐘意走黎走去，有時會好高興咁係遠處走過黎撲埋我度。最攪笑係鍾SIR要求潼潼舉手拎玩具既時候，佢竟然捉我隻手舉起。到後黎派茶點同樣要求由媽媽舉手而唔肯自己舉手，因此鍾SIR無派餅餅俾潼潼。潼潼見到個個同學仔有得食佢無得食，終於投降，走埋鍾SIR面前一邊講「舉手」一邊舉起手要拎餅。
今次既體操練習係：讓孩子握住大人雙手大姆指，而大人握住孩子既手腕讓佢地垂吊，往左右搖擺。呢個動作我睇書有教過，我都曾經係屋企同潼潼玩過，潼潼玩得好開心。但係今日鍾SIR話潼潼對手太幼，所以放棄同潼潼做呢個動作。咁潼潼媽都唔敢再同潼潼咁樣玩喇! 
希望潼潼病好之後可以食番多D野，等手仔腳仔粗番D啦。
2009年2月13日 星期五
超級寶寶@海悅
今日潼潼媽本來請左半日假，打算去另一個上課地點同潼潼補番一堂超級寶寶課堂，點知最後都做野做到四點先走得。
去到海悅呢個上課地點，感覺比係平日去觀塘既上課地點好好多。海悅呢邊既上課地點係專為小朋友上課而設既中心。門口要先除好鞋，入課室之前仲有姐姐先探體溫，課室入面仲有三個因應小朋友高度而設既洗滌盤，小朋友開始上課要先洗手。而觀堂既上課地點只係個瑜珈室。而且海悅呢度可能因為好多小朋友一齊上課，所以係互相影響下，小朋友都好主動好精叻。不過就係因為將軍澳呢個新區太多小朋友，所以呢個地點實在太難報名，況且呢度兩歲以後不設班，所以潼潼媽都係選左觀塘呢個上課地點。
今日上堂潼潼好呆，全堂都唔主動，好靜，連老師都話佢比係觀塘上課既時候靜好多，鍾SIR話可能係因為呢度太多小朋友既關係，而我就留意到潼潼亦有因為呢個上課地點比較多玩具而有些時候令潼潼分左心。雖然潼潼好呆，但係我見佢依然係ENJOY上課，同埋覺得好玩同開心。
放學課我同姐姐講番，姐姐先話潼潼全日都係咁好呆無乜心機，我諗可能潼潼仲未完全康復，所以個人都係沒精打采咁， 好彩番到屋企之後個人叫做精靈番少少。
2009年2月10日 星期二
輪狀病毒? 洛沃克?
潼潼又病了。
星期日晚上潼潼坐巴士回家途中嘔了，我地唔太肯定佢係暈車浪?抑或爸爸抱佢時訓著左所以對手壓親佢?還是真係病左，所以當晚未有理會。
點知到星期一夜半，潼潼兩度半夜邊睡邊扭計係度喊，第二朝訓醒又肚瀉，所以又要帶潼潼去睇醫生喇！
去到睇醫生．．．．
醫生：唔會咁耐都未清架！佢應該係再次惹到！
我：咁佢唔係應該有抗體架咩？
醫生：咁同類病徵都會有幾種：輪狀病毒．．． 洛沃克．．．即使同一樣輪狀病毒都會有唔同。小心D啦，呢排好多小朋友都係咁。
我：咁駛唔駛唔出街
醫生：咁又唔駛~~~ 就算佢唔出街，你地出街都有機會帶D病菌番黎。小心D多D洗手。
估唔到潼潼病好了未有一個星期又再染病。
2009年2月8日 星期日
超級寶寶 - 第三堂
上左兩堂超級寶寶學堂，第二堂見到潼潼有少少進步，不過之後因為新年停左一個星期，跟住一個星期潼潼又唔舒服無上堂，而家隔左兩個星期先再上堂，唔知潼潼會唔會又要重新適應呢？
幸好潼潼今次既表現都理想，比第二堂更見進步。有部份動作已經會自己主動去做，又識得依指示出去拎玩具/交番D玩具，仲會開始肯出聲講下野，舉手問老師拎玩具同餅餅等。
雖然一個星期先上一堂，堂上做既都只係一D小玩意，但係不知不覺間俾潼潼有機會學習下守規矩守秩序，學習忍耐，咁絕對係件好事。
2009年2月7日 星期六
2009年2月6日 星期五
2009年2月1日 星期日
輪狀病毒
潼潼同表哥仔分別都中左輪狀病毒，潼潼除左初四半夜及初五早上嘔過之後，其餘幾日都只係肚瀉，比起表哥仔情況已算好。表哥係一食野就嘔，攪到要拮止嘔針呢！聽講呢排好多小朋友都中左呢個輪狀病毒而又痾又嘔，媽媽們真係要加倍小心，注意衛生喇！
講番潼潼既情況：
初四晚上作嘔，至午夜嘔肚大作。
初五朝早食過早餐再嘔，看過醫生，吃了止嘔藥，沒有大礙，只係吃了粥就肚瀉。至午夜發燒至102度，兼片片有便便，要半夜起黎餵退燒藥及換片片。
初六 (星期六)，每次潼潼話要尿尿既時候，其實就係要便便，水水的。潼潼整天嚷著要街街，潼潼媽幾經爭取先得潼潼爸同意，帶潼潼到商場走了一轉。潼潼因為病，呢幾日似乎比較扭計，睡至午夜起黎堅持要姐姐起身陪佢去尿尿，尿完之後又要姐姐抱，可憐姐姐已經第三晚無覺好訓喇！
初七（星期日），潼潼食左幾餐粥，尋日早上果餐粥已經唔願食。問過潼潼，佢話要食麵，潼潼媽就膽粗粗煮麵俾潼潼食。期間潼潼急不及待，不斷在吵「食麵食麵」。煮好麵，潼潼好心急，食得好快。可惜食到一半已經又要去便便，坐係廁所坐到快要訓著，潼潼媽就俾潼潼睡午覺。中途醒過幾次都依然叫著「食麵食麵」。訓醒本來要上PLAYGROUP，但係潼潼太呆，一直賴在媽媽身邊半步不離，所以最終都放棄無上PLAYGROUP。然後上舅公屋企團拜，又煮左半個麵餅俾潼潼食，可能潼潼真係太餓喇！食得好快，好多，仲唔駛媽媽餵，自己好快手食哂D麵添，只係中途又去過便便，不過肚瀉的情況比早上輕。
尋晚係潼潼染病以黎第一晚安安靜靜睡到天明。潼潼媽今日雖然身在公司，但都KEEP住打電話番屋企問姐姐潼潼個情況。潼潼今日都係食粉麵，而且無再瀉。到晚上仲嘗試俾左一細杯奶潼潼飲先訓。如果聽日潼潼都無事，咁相信佢已經係完全康復，咁就太好喇！
訂閱：
文章 (Atom)