寫英文字

「專家」話小朋友學寫字先要配合手部小肌既發展，所以我從來無勉強潼潼學寫字。

「專家」話小朋友對各方面既發展都有各自既敏感期 。想要好好培養小朋友，就要懂得把握佢地既敏感期。

係學寫字方面，學校係有做線條練習，不過懶媽媽就無額外要佢多練習。

不過呢日潼潼就無端端自發地寫左幾個英文字。

姐姐話潼潼自己係度寫英文字母，唔識寫時就自己走去門口貼住既字母表度，用手指指劃住，之後再自己坐番埋位寫。

或者，潼潼已到左學習寫字既敏感期。

 

後話:  雖然我有即時誇讚潼潼，但之後幾日潼潼都唔肯提起筆寫字喇。

醒獅表演

所住既屋苑每年都有醒獅表演。

呢日就特登帶潼潼去睇，潼潼都表現好興奮，邊看邊跳。睇完之後仲要媽me背住佢係度咚咚撐。我都唔掃佢興倍佢癲左一陣。 

舞獅表演

新年特別多舞獅活動，之前係東港城都碰到一次舞獅，不過當時已經表演完，獅仔向各商鋪賀年，所以無乜野睇。今日係新都城就碰岩開鑼，可以同埋潼潼去湊熱鬧。

呢次舞獅表演真係精彩，除左紙炮，仲出動到煙霧同吹泡泡，視覺效果唔錯。連潼潼咁怕嘈，都寧願一邊掩著雙耳，一邊繼續欣賞。表演隊伍好醒目，表演完畢後將個獅頭舞向大家，大家都紛紛湧去摸下個獅頭攞個彩。佢地真係好好人，仲來來回回好幾次，以滿足所有圍觀既人。

最後仲俾人影相添！

其中一條獅仲同潼潼玩，張大個口將潼潼個頭都放左入獅口入面（大吉利是）。潼潼話佢唔驚，佢話知道係人扮架喎！只係怕嘈唶！

賀年甲

呢個農曆年潼潼媽貪得意整左三個賀年甲款玩下。

潼潼爸最鐘意係第一個款。第二個款清清地我都幾鐘意。去到第三個款，其實已經諗唔到可以點整，塗完又擦，擦完又再塗，試左幾次之後，先隨便塗完色後畫番條金線算。其實個甲油係紫色，唔知點解影黎影去都係偏藍。

2011農曆新年

潼潼番學之後就便利左媽媽，好多野唔駛媽媽教佢都會。好似呢個新年咁，好彩學校教左潼潼唔少祝賀說話，靠呢個懶散既媽媽真係唔得掂。佢今年最常講既係「兔年快樂」﹑「新年快樂」﹑「龍馬精神」﹑「身體健康」﹑「龍精虎猛」﹑「花開富貴」。雖然講黎講去都呢幾句，不過對於K1小朋友黎講，大人聽到緊係俾滿分啦！

二月三日　年初一　拜年日

每年既年初一都係最忙既一日，要四出去拜年。不過多得姨丈姨媽幫手，D賀年禮品一早係團年時留哂係佢地車上面，所以我地今年就輕鬆好多喇！

二月四日　年初二　玩樂日

通常到年初二我地已經好遊閒，於是同潼潼落吉之島睇下野。潼潼就係吉之島試玩左Wii，玩完又排隊，一共玩左三次呀。到夜晚去表姨屋企食開年飯，然後睇煙花，之後又玩左xBox。以為潼潼玩唔掂，點知佢又似模似樣，尤其是玩跳舞game既時候，都跟到幾足下。見佢跳舞個樣真係好趣怪，可惜無拍低落黎。

二月五日　年初三　單車日

呢日係表姨一家第一次到訪我地屋企。之後仲專車接送我地去馬鞍山踩單車添！潼潼已經好耐無掂過架單車喇，今次真係唔該哂表姨，等潼潼有機會操下架單車。

二月六日　年初四

呢日係同爸爸一眾親戚團拜。可能太陌生，潼潼超扭計，唔多願講野，莫講話拜年，連基本禮貌都欠奉，真係失禮哂。不過一出動到Wii又唔同哂，一邊打機一邊說話多多。經過打機既熱身之後，當堂精靈又生猛哂，食完飯之後仲夠膽自己去問舅公可唔可以再玩添。

二月八日　年初六

潼潼媽就年初六下午開工喇！阿囡就仲放緊假，攪到我好想可以繼續放假陪阿囡玩，可惜唔可以。呢幾日就靠潼潼爸陪囡囡出去玩下喇！