K2老師家訪

岩岩開學未夠一個月，就安排了家訪，寫既時候先感覺呢個安排原來亦頗貼心。

係老師黎之前，我先同潼潼預習左點樣招待老師，等佢有個心理準備。唔知係咪太好準備，當老師黎到時潼潼表現好興奮，不斷同老師講個不停。又不時拎出照片同玩具同老師分享，攪到我同老師未能好好傾談。最後要由爸爸出馬，去左同潼潼玩，我同老師先傾到計。

今次老師主要都係講番呢個星期初潼潼唔想番學既問題。

老師話由幼兒班升低班，其實係一個過渡期。最初我聽到都有D不明所意，問個究竟之後，先知道除左功課有變動之外(開始要寫字喇)，學生亦要開始學習自我照顧。例如午睡後要自己褶被﹑食茶點/午飯時要自己執拾等等。可能潼潼感到壓力，不安情緒亦係過去一﹑兩週從行為上表現左出黎，只係潼潼媽未有即時察覺。包括係學校時經常上洗手間，又整個星期都叫住話肚痛唔想番學。不過老師就話潼潼過去一兩日表現似乎開始穩定番。

由我同老師言談間可以總括到潼潼既兩大問題，一係自信心唔夠，二係輸唔起。

而家好多野開始要由小朋友自己動手做，而好多時潼潼係未做已經話自己做唔到，每次都需要人去鼓勵先肯嘗試。其實呢個情況係屋企都經常出現，但係真係唔明點解潼潼會有呢個問題。感覺潼潼年幼時都蠻有自信，每事都躍躍欲試，唔知係幾時開始俾我地大人打繫到咁怕事。 而我相信潼潼亦係對自己有要求既人，尤其是o係學校既表現，佢一直都努力去表現出自己係個好學生。不過就因為佢輸唔起，怕自己做唔到老師要求做既，所以做成壓力。老師話佢地而家下午有時會玩uno遊戲(咁細個玩到uno，真係嚇我一跳，有點低估左小朋友添)，等佢地能夠從遊戲中學習接受挫敗，而且失敗過後亦隨時可以反敗為勝。亦會把握基會係一眾小朋友面前表揚個別小朋友既好行為，以增強佢地既自信心。

得到老師既提點，我會多加留意，希望之後會見到成績。