2011中秋節

每年中秋節屋苑都有活動，夜晚會有好多人到樓下玩，好熱鬧。往年因為要到嫲嫲屋企食飯做節，番到屋企時已經好夜，所以潼潼未必有得玩。不過今年唔同喇！嫲嫲上黎我地屋企食飯，我地食完飯就可以落去樓下玩。潼潼都好心急，一食完飯就係咁催我地落樓。

潼潼有得落去玩好開心，係咁跑係咁跑。自己拋螢光棒波波自己追，樂在其中，反而係潼潼媽見到佢自己一個玩感覺蠻可憐．．．

後黎潼潼都搵到ｄ小朋友同佢一齊玩，不過潼潼太自我，都係未識得同其它小朋友一齊玩。最後仲因為背住螢光棒蝴蝶既潼潼被其它小朋友叫作「蜜蜂」而唔開心喊起上黎添！我嘗試安撫潼潼不果，唯有帶潼潼離開，最後仲俾爸爸教訓一頓，不歡而散。

好彩潼潼番上樓後已經無乜事，亦可能其實佢都已經好攰，之後都好快訓左喇！

潼潼，雖然你被爸爸教訓而喊左好一陣子，但中秋節既晚上，希望你依然睡得甜罷！