潼潼媽學人DIY美甲，買左KONAD既印花，整過好幾次，但都唔太滿意，呢次算係比較好，影番張相先。
2010年3月28日 星期日
2010年3月27日 星期六
幼兒芭蕾舞班
呢日潼潼正式上第一堂芭蕾舞班。雖則話芭蕾舞班，其實只係諗住俾d活動等潼潼參予，而無諗過要真係學跳芭蕾舞。
今日上堂潼潼表現得幾理想，有八﹑九成既動作都肯跟住做，亦都投入去玩，有少少係我意料之外。而老師對小朋友亦好溫柔及有耐性。
老師問：海洋公園有咩動物呀？
潼潼大聲應道：老鼠！
老師：海洋公園有老鼠？好啦！我地做一隻老鼠。
然後就指導小朋友將雙手放係頭上扮一隻老鼠，再去搵芝士食。
跟住扮完老鼠，又有小朋友話海洋公園有水母，所以老師又同小朋友一齊扮水母喇！
老師問潼潼：你隻水母咩顏色呀？
潼潼：黑色！
老師：下？黑色？粉紅色好無呀？
潼潼：唔好！
真係一個奇怪又夠堅持既小朋友。
見潼潼玩得開心，媽媽都好開心。今次總算無選錯喇！
2010年3月22日 星期一
2010年3月21日 星期日
遊海洋公園
臨時決定去海洋公園，因為表姨贈送既免費海洋公園入場券要到期喇！
本來諗住帶潼潼去海洋公園開開心心玩一日﹑影多D靚相。但非常失敗！潼潼玩得唔開心之餘，相機又無電。
我地首先去北角同舅夫會合，然後舅夫就揸車載我地一齊到海洋公園喇！去到海洋公園第一個節目係睇熊貓，然後就準備坐海洋列車到大樹灣一邊。
呢架海洋列車係模擬進入海底世界。係列車頂上面既玻璃窗可以睇到「車外」既海洋生物。
不得了！期間列車被一隻巨型八爪魚纏住，連玻璃窗都爛埋添呀！
唔知係咪潼潼媽形容得太神似，潼潼竟然嚇到喊起上黎。
可能就係咁，影響仲潼潼整日既心情。我地係海洋列車出黎之後本來想進入水母館，點知未行到門口，潼潼已經喊定先唔肯入去。再去海洋館，一樣喊住唔要入去。
佢個個館場都唔肯入都唔係辦法喎！夾硬抱佢入去，佢就一路行一路喊。
呢個時間見到有人員拎住個籃仔兜售Ｄ小玩具，於是潼潼媽第一項破財工作就係買件玩具俾潼潼氹左佢收聲先。最係潼潼係收左聲，但係依然無乜笑容。
之後我地去過機動遊戲果邊玩過攤位遊戲，再轉去海洋劇場。潼潼睇左一陣表演，但似乎無多大既興趣。之後我地再去太平洋海岸餵海獅，然後就乘登手吊車番去正門。潼潼坐吊車一路都話唔驚，但係一直都捉住我地唔放呢。
最後帶潼潼去兒童天地 - 威威樂園。不過蛙蛙跳唔敢玩，旋轉木馬唔敢坐木馬，只係坐上面既車仔，潼潼想玩既彈床則唔夠時間玩。平時潼潼好大膽，點知好多野都驚唔敢玩。究竟佢真係佢細膽定係俾架海洋列車嚇傻左呢?
咁就完成左一日既海洋公園之旅。值得一讚既係園內為坐輪椅人士提供唔少便利服務。我地更持公公坐輪椅而得到唔少名正言順既打尖機會。
睇下！連坐吊車都可以安排特別車廂架！真係見識唔少。
2010年3月20日 星期六
無聊亂問
之前都講過潼潼呢排好鐘意打爛沙盤問到篤的無聊問題。
3月7日晚上，潼潼媽等外賣等得耐。
我：都係沖左涼先喇！
潼潼：沖完涼做乜呀？
我：沖完涼食野囉！
潼潼：食完野做乜呀？
我：食完野睇電視！
潼潼：睇完電視做乜呀？
我：睇完電視訓覺！
潼潼：訓完覺做乜呀？
我：訓完覺起身！
潼潼：起身做乜呀？
我：起身食野！
之後？我都唔記得答到去邊，跟住入左洗手間，姐姐續答，然後以潼潼一句口頭譂「唔係呀嘛？」結尾。
潼潼呢排成日提住迪士尼樂園，3月20日中午潼潼大解時：
潼潼：迪士尼樂園係邊呀？
我：係東涌。
潼潼：東通係邊呀？
我：係大嶼山。
潼潼：大嶼山係邊呀？
我：係西面。
潼潼：西面係邊呀？
我：西邊係你左手邊。（哈哈~ 好壟統既答案) 你左手係邊呀?
潼潼亂指佢大脾。
難得有個傻媽陪佢一齊傻，答埋D傻答案。
訂閱：
文章 (Atom)