食蜜瓜

早上買左個中國出產既日本網紋瓜，其實咪又係蜜瓜一個。不過潼潼就食得好開心，口入面既未食完又搶住要另一「舊」。食到最後一「舊」既時候，仲含住係口入面好耐唔捨得吞添！

小出血

搬左入黎將軍澳大約三年，係呢區既活動範圍只限於坑口同寶琳，其它地方完全唔認識，所以今日爸爸提議到尚德走一趟。

到左尚德一帶，感覺同普通屋村無乜分別，無乜野睇，商場亦都唔吸引。後黎去到將軍澳商場之後就比較好一d。我地行左大半日，其實無乜收獲，最大收獲係潼潼。睇下！有新鞋﹑衫仔﹑口水肩﹑戒片褲。條戒片褲係純粹因為圖案趣緻所以買左，暫時都未有實際用途。　最犀利既係仲有一條手環，係咪好潮呢！最後係一對會咇咇叫既平價涼鞋，40蚊左右，買黎玩下囉！

買左都唔少野呀！爸爸投訴我一邊嗌住ｄ商場無野睇，一邊係咁不停購物呢！

自行往便便

今晚又十一點幾先番到屋企喇！無得同潼潼玩，不過我都會問下姐姐潼潼既情況。

潼潼都幾奇怪，每逢佢出街都唔會便便。就係因為咁，試過連續兩日去左街街無便便之後，第三日便便既時候就有困難，攪到屁股仔出血，佢就喊到個人傻左，喊足成個鐘頭有多。呢次之後亦試過一兩次類似情況，所以而家我都好在意潼潼係咪每一日都有便便。

由於尋日潼潼無便便，今晚番到屋企就問姐姐潼潼有無臭臭喇！姐姐話：「有呀！仲好乖添呀！一邊喊住（潼潼每次想便便都係彎哂腰咁係度喊，我地就知佢想便便架喇　）仲一邊識得去廁所拎廁所仔。」嘩！！潼潼，你真係叻女呀！媽媽真係好開心。你由未夠一歲開始學用廁所仔，到而家就快15個月大，你終於識得自己去廁所喇！

潼潼，如果你快Ｄ學識埋係廁所度噓噓就好喇！到時就慳番唔少尿片錢咯！

美妙舞姿

要看潼潼的美妙舞姿嗎？同場加映發脾氣片段。

食羌???

「食羌?? 媽媽，你唔係咁玩嘛?」

話說潼潼食手指頭既習慣越黎越嚴重，所以今日就貪得意，試下用最傳統既方法懲戒下佢。我用片羌係佢手指頭上擦左幾下，但係佢若無其事咁繼續啜....... 於是姐姐用羌再擦，之後潼潼竟然搶著要拎舊羌，於是就俾左舊羌佢喇。最初佢仲係輕輕咁用脷舔，點知佢好似越試越滋味咁，最後．．．．．

大家會唔會覺得我呢個做人阿媽既太過份呢？其實我都覺得有少少架。

紙箱頭盔

潼潼喜歡玩紙箱，大小紙箱都一樣唔放過。

士多啤梨園 + 香薰園

四日復活節假期既第一日，約好左姨媽一家同舅夫﹑婆婆去粉嶺摘士多啤梨同埋遊香薰園。

第一站係中國花園士多啤梨園。

潼潼見大家係度摘啊摘，佢都摘埋一份，不過佢係摘士多啤梨葉，摘完之後仲要放埋入口添。

舅夫行到去最遠最無人既一塊士多啤梨田度摘，所以摘到既士多啤梨係最大最靚既。

不過賣單找數果陣，佢地竟然話要40蚊一磅，我之前睇過好多人都話係100蚊三磅架嘛，分別坐地起價，佢地仲夠膽話賣左幾年都係呢個價錢添。

之後就係落鶴藪既香薰園。呢度設施都唔錯，可以餵羊﹑餵錦鯉﹑撈金魚，又有兒童遊樂設施，岩哂小朋友。而且仲可以燒野食，見到有得燒乳豬添呀。

最後我地就去埋雲泉仙館食齋，附近環境都幾靚架。今日節目真係豐富喇！最緊要係大家都玩得開心嘛！　

講電話

「喂喂！喂喂！去街街！！」

幾乎任何拎係手既物件，潼潼都可以將佢地當作電話。

值得一讚

今日同潼潼去沙田度同嫲嫲食飯，攪到好夜先番呀！番黎之後就同潼潼除鞋仔，點知潼潼好乖咁，自己將除好既鞋仔放番係鞋架上面。真係叻女呀！為左繼續培養好潼潼呢個好習慣，我諗遲d個鞋架都要騰出一d空間俾潼潼用喇！

偷閒遊公園

呢個星期六又要番公司為應酬者進行面試喇！雖然呢日只有兩位應酬者，但係為左遷就佢地既時間 ，兩個面試分別安排係9:30同13:30。就係咁，呢個星期六我又無左大半日時間。

不過我仍然增取每一個機會同潼潼親子樂一番。你地睇下潼潼笑得幾開心。

p.s. 鳴謝子軒媽媽，係個blog度介紹左photo scape軟件，以後為潼潼貼相時就精彩得多喇！

屋企的遊戲

係屋企可以玩d乜？原來都好多野玩架！

生日派對

今日潼潼參加左朋友茄茄女兒 - 津津既3歲生日派對。

朋友好有心思，每位參加派對既小朋友都會收到一份回禮禮物。多謝哂！

潼潼呢？，一去到見到波就唔理三七二十一，自己一個係到執波玩，完全唔理人。

我都無佢咁好氣，唔理佢走左去搵小怡。今次係我第一次見怡怡媽一家。小怡比潼潼更似BB，好可愛呢！

原本以為今日會影好多相，而且我亦都成日拎住部相機周圍走，但係其實我無影到幾多張相，因為要同小朋友影相真係好難架。

生日會入面，曾經播出津津由出世至而家既成長照片。做左人阿媽之後，對呢方面特別感觸咁。小朋友實在大得快，當初出世既時候只係一個乜都唔會既人仔，轉眼間已經咁大個。我又再懷念潼潼剛出世既時候。

雖然今日唔會津津正日生日，不過我係度祝津津能夠每日都快快樂樂，健健康康地成長。

潼潼wallpaper

而家潼潼幾乎可以用會行會走黎形容。隨住佢既活動能力加強，同佢影相就越有難度。每次同佢影相佢都無時停，影出黎既相成日都有鬼影。更加麻煩既係，我覺得潼潼係有意避開我相機個鏡頭囉。

雖然係咁，我都會盡量「亂影」，漁翁撒網既情況下都偶有佳作。好似今次去公園就影到有張我幾滿意，所以用埋黎做電腦wallpaper添。

木箱遊戲

原來個木箱係用黎咁玩既．．．．

睇下！抱佢番出黎佢都要自己爬番入去．．．　

行石春路

工作太辛苦喇，決定請番日假陪下囡囡先。行完街街就同潼潼去公園玩，仲行埋石春路添。

鑽紙箱

買左架車仔俾潼潼，屋企又出現一個紙箱喇。潼潼或者以為所有紙箱都係好好玩既，所以今晚又將d物件丟入紙箱以後，就鑽入去想拎番出黎。但係．．．．　個紙箱實在太細喇．．．．　潼潼卡住係紙箱入面．．．　

我同姐姐就笑得開心咯，可憐潼潼想爬入紙箱拎番d野，但係「見過鬼」之後又唔敢再爬入去，唯有坐係地上面喊！

家庭樂

今日一早我地就準備帶潼潼去同公公姨媽一家飲茶。

潼潼而家知道出街就要拎鞋，不過．．．　雖然佢腳已經著左鞋，但係佢仍然去拎佢其它既鞋放哂落佢既私人座駕度．．．

飲完茶之後我地就去康山吉之島shopping，又係幫潼潼買左衫同玩具 ．．．。跟住又係落鰂漁涌公園玩喇！睇下潼潼玩得幾開心。

好喇！太陽落山，天氣開始涼喇！我地都係時候走囉！