第一次食糊仔

我有糊仔食喇！呢個牌子既糊仔係姨媽介紹架。不過媽媽搵左好耐都搵唔到，最後要打電話去訂貨先買到番黎俾我食咋！唔該哂媽媽！

唔～　好好味啊！

媽媽～　你快手d啦！我等得好心急呀！

咦？咁快食哂架喇？

媽媽真偉大

今朝當潼潼訓醒，我如常抱起佢準備交俾姐姐幫手餵奶。但係一抱起佢，就發覺潼潼手心同腳仔燙熱。應該係因為尋晚打左預防疫苗所致。我為潼潼探熱，有101度。

我呢個新手媽媽雖然知道打針後發燒係正常反應，但係根本唔知道幾多度先係可接受範圍。根據醫生所講，發燒若低於100度都屬正常，但係而家101度喎，係咪應該睇醫生呢？老公又覺得唔係大問題，認為毋需要去睇醫生。我真係好擔心，我好怕我o既一時疏忽會對潼潼做成傷害。

最後老公請左假睇住潼潼，但係其實我仲係好唔放心，吩咐工人姐姐替潼潼餵藥，探熱，抹身之後就番工。番到公司以後心裡亦急住想盡快放工番屋企睇潼潼。直到我問過阿姐，知道bb容易發燒，而且經常性燒至103度亦屬平常事，加上媽媽報告潼潼體溫已下降，我先稍為安心。

我以前根本唔明白點解d媽媽點解會咁緊張，咁小題大做。我而家終於明白佢地o既心情。做媽媽o既係真係唔想自己o既仔女有任何傷害。所以歌仔都有得唱﹕「我愛我的媽媽，媽媽真偉大」

藍天白雲

星期六日落過幾場大雨之後，維港兩岸難得的清淨。

除藍天白雲外，還有金光閃閃的海面，實在迷人。如此美景在香港已很少機會再見。

 

2007年5月21日

出生128天，4個月9天

體重5.88kg，13磅

 

 

我愛看書?

小朋友養成閱讀的習慣是好事。潼潼喜歡看書嗎？我也不曉得。你可以從以下被潼潼蹂躪以後的小冊子中告知我答案嗎？

我會企

潼潼，媽媽教你做人要腳踏實地，唔好心頭高﹑大想頭﹑好高傲遠﹑未學行先學走。
你而家連翻身同坐都未識，做乜咁快學人要企呀?

新玩具 vs 膽小鬼

昨晚買了新玩具給潼潼，滿心歡喜的帶返家，期待著潼潼燦爛的笑容。誰知道........

還未有裝上電池，只是輕輕的撥動中間載有膠粒的滾筒，發出沙沙的聲音，潼潼已嚇得驚呼怪叫。這個小不點的膽子真小，真不明白怎麼這樣簡單的聲音都可以給嚇得驚惶失措。最後我唯有在她面前興高采烈的示範了好幾遍，每一次都要表現得很高興，她才會對著我們報以一笑。但是不一會又露出惶恐的表情。她就是這樣的一直似笑非笑，似哭非哭。

至今晨再給她這玩具，情緒顯得較昨晚穩定。亦漸漸懂得"控制"這小玩兒了。

這玩具上面雖註明適合10個月大嬰兒，卻沒有太大難度，給4個月大的潼潼把玩感覺上還可以。

 

撥動兩旁的轉輪及輕按兩個笑面都會發出聲音及閃燈。

 

感覺上不太難操作。不同於一般玩具，兩個轉輪不需耗上太大的氣力便能輕易撥動。所以蠻適合小朋友的。

我的偶像

bb乜都唔識，乜都要學。但係我見住潼潼成長，就發覺其實好多野我地都要向佢地學習。

 

佢地做事好積極。雖然乜都唔識，但係會努力學習。

佢地面對無數的挑戰，從來唔會停落黎，一個接一個。

佢地做事唔怕失敗，屢敗屢試。

佢地好單純，充滿寬恕，對任何人都唔會有嬲怒。

佢地性格樂觀，只要有人陪佢玩，佢地已經回報你滿足既笑臉。

佢地無物慾既要求，好簡單的只求溫飽。

 

我見到潼潼，我覺得bb先係最值得人學習，最值得我欽佩既人。

美人出浴

以前年少不懂事，每次洗白白都喊餐死。

　而家唔同哂喇！人大o左，識得享受，天氣又暖左，咁就緊係要慢慢歎啦。

你睇下我幾專心咁係度玩踢水。

 

洗白白真係好舒服，你睇下我笑得幾開心就知啦。

背後的郵輪

搬了寫字樓以後，從我座位後面的窗外望去，每日都有不同的大郵輪停泊。昨天到港的這艘郵輪外觀特別趣怪又豪華(豪華是我猜的罷 )，所以隨手用手機把她拍攝下來。

諷刺的是，每日都有大大小小的郵輪泊港，載著遊閒愉快的遊人；我卻在前面的辦公桌上忙著，沒有多少閒情去欣賞窗外的維港景緻。

我的驕傲

係每個媽媽o既心目中，佢地o既小寶寶都係咁獨一無二、最可愛同最靚o既，所以好多時我都唔會特登係其它人面前讚自己囡囡。不過當每次聽到人o地讚潼潼我都會好開心。

上星期天同潼潼行商場，經過一間店鋪，入面兩名店員逗潼潼玩。唔知點解當日潼潼心情特別靚，反應特別好，竟然會對人卡卡笑。"乙水"到兩個店員鬼咁開心，仲猛咁讚潼潼。眼睛、耳朵、鼻子都給讚過了。我作為潼潼媽當然感到開心同引以為傲啦。

潼潼，你係媽媽一生最大o既成就呢。

努力keep fit

潼潼做運動比媽媽勤力。最近努力keep fit做收腹運動：保持呢個抬起頭同雙腿o既動作能hold住好幾秒呢。

祝生活愉快

我覺得做人有時真係幾多煩惱。我對女兒潼潼無太大o既期望，只希望佢一生都幸福快樂。

為左達成呢個心願，好多時我係潼潼剛訓著o既時候就會進行「催眠」。我會細細聲同潼潼講：「媽媽好錫潼潼，爸爸，麻麻，婆婆都好錫潼潼。個個都好錫潼潼架。潼潼好多人錫好開心，成日笑，好鐘意笑，係個好開心o既小朋友。」不斷咁重覆住。

唔知係咪「催眠」真係湊效。最近潼潼係無時無刻地不斷傻笑，就算無人陪佢玩，佢自己一個都可以係度哈哈大笑。潼潼傻左喇！　

大翻身

最近潼潼努力扭動著身體學習翻身

 

睇下！終於成功喇！！！

其實只係我將佢翻轉。潼潼仲未學成大翻身呢。

第一次吹風扇

媽媽想和你去吹吹風呢，但潼潼怕吹風怎麼辦？

由於潼潼最初每次出外番黎都夜晚都會大扭計，所以有一段時間我地都盡量減少帶佢外出。或者係呢個原故，佢對「風」呢樣事情都幾陌生。夏日炎炎，諗住開風扇等小潼潼舒服d。誰知佢極怕風，係度左閃右避。原來bb真係乜野都要由頭學起，連吹風都不例外。

被冷落了的部落格

最近少了寫網誌。是工作太忙罷！亦因為工作太忙的關係，連見小潼潼的時間也減少了。心裡怕著與寶貝女兒的關係會漸漸疏遠，每有空餘的時間，都寧願全部都留給小潼潼。

最近潼潼很會使脾氣。每有遇上不稱心的事情，就從喉頭發出不滿的「唔唔」聲，尤其是當有工人姐姐作後援的時候，更是有恃無恐的不把我這個母親大人放在眼內。我真的怕潼潼會就此給寵壞，已囑咐工人姐姐不要受潼潼的怒吼聲操控。

潼潼是放不下的了，唯有冷落了部落格。