2012中秋節

呢日節目好緊湊，除左去同學仔生日會，呢日仲係中秋節，要去嫲嫲屋企過節食飯，食完飯又趕住番屋企玩燈籠。

唔知係咪今年中秋連續四日假期，Ｄ人去哂外面玩，屋苑樓下無往年咁熱鬧。不過潼潼一樣玩得開心。

同學生日會

潼潼獲同學仔邀請，參加佢既生日會。呢次係潼潼第一次參加同學仔既生日會咋，全部都係熟悉既小朋友，大家都玩得好開心。



睇魔術表演既時候，一樣投入。

最緊要既就係同壽星女影番張合照啦。

潼潼與MICKY (第2回)

好多時潼潼臨訓前都喜歡要我扮MICKY同佢傾偈。呢日我用緊MICKY身份同佢傾偈既時候，唔小心話左佢一句，叫佢快D訓，佢竟然遷怒於MICKY。　以下係潼潼同「MICKY」既對話，當中其實夾雜左唔少我地平時對潼潼講既說話。

潼潼：我唔同你訓呀！你自己係果度訓。

媽meMICKY：但係果度訓得唔舒服架喎!

潼潼：咁你訓呢度啦！其實你都大個喇！要自己訓架喇！　（呢句係爸爸平時對潼潼講既）

媽meMICKY：你都唔錫我既!  (呢句係媽me學潼潼講)

潼潼：唔可以講晦氣說話架。 （平時潼潼媽就係咁回應潼潼，又輪到潼潼學番我既說話）

媽meMICKY：咁我同媽me訓唔同你訓。

潼潼：聽日我會同番你訓。

之後果句先犀利，嚇死潼潼媽。

潼潼一邊用毛巾仔幫MICKY冚被，一邊自言自語：MICKY真係大個喇！張毛巾都已經唔夠喇。估唔到公仔都會大個。

 公仔都會大個??? 咁真係好得人驚喎!

交小一派位表

呢個星期開始要遞小一入學申請表，開始第一階段 - 自行分配學位。
 
同其它媽咪唔同，我無周圍幫潼潼張羅學校，無去面試，所以相比下輕鬆好多。講真，要面試的話，我地真係無乜野可以比人睇，憑乜野同一爭丫!

阿囡，靠你自己喇! 睇睇你有幾好運氣。

故事書

潼潼又有新創作，今次話要自己整本故事書，由佢話圖畫，媽咪撰文喎!

雖然故事內容唔知講乜，插圖亦畫都唔好，不過都係好嘗，值得鼓勵。

K3開學

放左悠長暑假，9月4日新學年開學喇! 同往年一樣，潼潼媽特別請左日假陪阿囡番學。



個多月無見，好多老師同嬸嬸見到潼潼第一句就話佢高左。日日見住又不為意，後黎認真望下佢條裙，再度下高，又真係高左喎! 小朋友真係大得快。



潼潼今年升高班喇! 係幼稚園生活既最後一年，其實我都係好唔捨得。一黎呢間學校上至校長﹑下至校工都對幼兒教育好有熱誠，對小朋友好有愛心。其次就係因為潼潼媽既蜜月期就快完喇! 升到小學真係有排捱。

陪左潼潼開學三年喇! (如果計埋學前班就四年添) 特登搵番之前開學首日既相回顧下。

K1首日開學

K2首日開學


睇下潼潼，K1同K2既時候都仲係面圓圓，變化唔大。而家塊面尖哂，真係變左大姐姐喇!