寫新歌

潼潼話要自己寫首歌喎! 不過似練字多D。

廣州花都美林湖

第二天既行程都係無行程　其實真係歎酒店架咋！報團時保證係酒店露台房。

遠景

近景


掂掂掂！

朝早食完早餐抖左陣之後，又係落去泳池游水。其實間酒店仲有泳池起緊架！

下午有一個行程，就係參觀明治雪糕廠。其實又係無乜特別，無野介紹，只係睇下廣告，然後位位一支雪條。



兩日遊樂團完結。回家真好！

美林湖酒店

前一日係我地一家三口自由行，呢日就報左團，同埋嫲嫲姑姐一齊係落馬州集合遊廣州花都。

我地參加呢個團既最大特色係無行程。本來係一心諗住輕輕鬆鬆黎玩酒店。第一日既行程只係遊一個景點，之後就番酒店享用酒店設施。點知好倒楣，導遊同司機都唔識路，我地由上午到下午，差唔多整個路程都係搵路﹑搵路﹑再搵路。最後都係忍唔住，放棄我地既唯一景點（其實都只係個公園仔），叫佢地直接車我地番酒店。

到左酒店，無論風景﹑佈置同服務都係一流水準。

衛生間（學下內地人講野先）有窗可以望番入面睇電視架！

因為已經好晏，係附近影下相，就要食晚餐喇！



食完晚餐，休息一陣就落去溫泉泳池游水。個泳池景其實幾靚，不過因為要游水，無帶相機出去，影唔到。

游完水之後既節目就係浸浴缸囉，媽咪仲特登為潼潼準備左浴鹽添架！

呢日幾乎全日都係坐車，悶死潼潼，好彩都夜晚都算叫做有得玩下啦！

遊華僑城

潼潼爸同潼潼媽趁暑假放左兩日假，第一日帶潼潼去影多啦A夢，第二日就開始我地上內地玩既行程喇! 潼潼仲揹埋佢好朋友 - MICKY公仔一齊出發添。



我地揀左落馬州關口附近既酒店，去到放低行李就即刻出發去華僑城。

嘩! 去到係中午時候，好熱好熱。其實真係無乜心機行同影相，潼潼媽一見到周圍噴出既霧水，就拖同潼潼一齊走埋去降溫。

再行入D，見到有個噴水池，又走埋去諗住玩下水降降溫

點知潼潼好快玩到濕哂! 幾乎係由頭濕到落腳。逼住係附近既商店買過條褲同埋買左對唔岩SIZE既鞋俾潼潼換左佢。

之後就去左兒童遊樂場，叫左有瓦遮頭，可以抖下喇!

不過好奇怪，係度玩既除左小朋友之外，仲有好多大人。佢地唔係只係陪小朋友玩，係真係自己坐上去玩。



玩完之後我地坐登山纜車上山行下。點解潼潼媽要放呢張相? 想俾你地睇下潼潼食爆谷? 唔係呀! 我係俾你地睇下左上角個小妹妹，佢話人有三急，小朋友忍唔到(肯定佢大過潼潼)，正在就地小解中。  唉.... 無言... 大剎風景，仲要正正坐係我身邊。 連潼潼都識話「上面咪有廁所囉!」真係大開眼界，潼潼爸話我少見多怪，要體驗下中國民情喎!
 


上到半山，又行下影下相。見D內地佳麗擺哂甫士影相，我地都不甘示弱，叫潼潼都黎一招拗腰影相先。



風景唔錯呀！

黎到山頂位，嚇死畏高既潼潼媽，我真係唔敢行出去呀!

拿拿拿~~ 叫我幫你地影相好喇，我連行埋攔杆邊都唔敢。影完呢張相我就一粒聲都唔敢出，係咁拖住潼潼向前走，只希望快D「埋岸」咋。



去到呢度，已經差唔多五點，太陽開始落山，舒服好多喇! 我地坐低抖下，睇下表演



之前食過雪條，而家再食雪糕，係咁抖暑



走既時候舒服哂，終於有心機影下相喇

其實香港打緊一號風球，好彩呢邊天氣都仲係好好。我地就係咁結束左第一日既內行程喇!

 

多啦A夢誕生前百年祭

趁暑假，潼潼爸同潼潼媽都請左兩日假，陪潼潼去玩下。

呢日係假期第一日，雖然係放假，但都晨咁早起身，為既係同潼潼去影叮噹 - 雖然而家叫多啦A夢。

因為「多啦A夢誕生前百年祭」，海港城擺放左一百個叮噹，又適逢暑假，攪到日日人山人海。為左可以順利同叮噹影下相，唯有犧牲下睡眠時間，晨早起身，食埋早餐，大約十點到海港城，但係已經唔少人。

潼潼影相好睇心情，佢唔想影既真係唔敢勉強佢，所以都係俾佢隨便揀幾隻叮噹影下相。不過除左海港城正門，叮噹仲分佈係海港唔同位置。因為潼潼媽係附近番工，又得同事幫手，所以一早搵齊料，去各大景點影相喇! 出發!!!!!!!