反對國民教育

人家有國民小先鋒，我家有遊行小先鋒，我地又黎喇!!

由維園出發


呢日酷熱天氣警告呀! 雖然早有準備，但亦都好難受。



潼潼係廣播中得自己身在維園，就話「下?! 又係維園呀? 唔怪得知啦! 」

可憐的維園呀! 我細個既時候，維園係去玩既地方；好對唔住，而家令你蒙冤，變成一個遊行集會，辛苦小朋友既地方。


好熱好熱，有無留意潼潼衣著唔同左？係除剩件背心囉，仲要沿途補充凍飲同雪條，先令到小朋友可以繼續支持落去。



為的好簡單：


最後，竟然可以領住潼潼行畢全程。囡，俾個讚你！！！

 

 

快速學成踩單車

原來爸爸果套唔用附助轆學踩單車真係得既。

相隔第一次學單車一星期，潼潼再學踩單車，已有進步，起碼取得平衡。

再隔一星期，已經成功了。掌聲鼓勵。

K2散學禮

又係一個期待既日子 - K2散學禮。

點解咁期待?因為散學禮有表演睇囉! 今次學校散學禮既主題係「化粧舞會」，而潼潼一班係揀左「非洲歷險記」黎表現。不過可惜既係，爸爸今次要加班，無辦法參加今次散學禮 ; 亦好遺憾，無左爸爸既協助，呢個媽媽係「攝」唔到位 + 唔夠高 + 眼盲搵唔到阿囡既情況之下，係唔能夠錄到阿囡既表演情況。

散學禮除左表演項目，仲有頒獎，潼潼今年係得禮貌獎。

跟住仲有遊戲及抽獎，學校真係好肯花心思，好好玩。抽獎禮品真係好多份，我同潼潼一直都好緊張幫手叫名，但係一直都抽唔中。不過我都好欣賞潼潼，即使只係其它同學仔抽中，佢都會替人開心。

去到最後開始抽最後三份大獎，居然抽中潼潼! 真係好開心呀! 潼潼媽未試過咁LUCKY，阿囡你係得既。

扮死

潼潼媽都幾無聊。

今日下午同阿囡係房玩玩下，突然醒起間唔中會有d新聞，講關於小朋友點樣機警， 係有需要時報警求救，最後救左家人。於是我就玩玩下訓左係度「扮死」 

阿囡係咁叫左我好多聲，我都訓係床度唔郁，想睇下佢會有咩反應。

點知阿囡抬起我個頭(我都要配合自己抬高個頭)，幫我墊個枕頭，然後蓋被，將陪佢訓既micky放係我身邊，開埋睡前音樂，然後就訓係度身邊同我一齊訓。原來佢以為我訓左。

 雖然呢個唔係我預期想知/想見既結果，不過見到阿囡咁體貼我都好開心既。

一步登天學單車

表哥仔既單車仔已經功成身退，所以送左俾潼潼。呢日就帶潼潼去學踩單車。

潼潼媽以前學踩單車係用附助轆，踩順左先拆轆既。但係爸爸就話唔用附助轆學先學得快。我初初都唔認同架，我覺得要俾小朋友享受到踩單車既樂趣，慢慢玩下玩下而學識先係「正道」。不過既然爸爸對呢個方法滿有信心既，就即管俾潼潼試下。

除左唔要附助轆，仲要搵一條有暗斜既路。暗斜路就搵唔到喇，搵到條短斜路。好似都唔錯喎!

再加D鼓勵，潼潼好似玩得唔錯喎! 希望佢可以快D學識踩單車啦!