原來潼潼既K1散學禮會有一個小小既表演。
好鐘意佢扭PAT PAT果段。哈哈~
)，不過覺得幾有趣就貼出黎分享一下。
2011年6月15日 星期三
腸胃炎基本護理常識
潼潼得了腸胃炎。因為呢次腸胃炎，先知道自己原來對腸胃炎既護理常識咁匱乏。
昨晚午夜一時多潼潼開始叫肚痛，上廁所又便便唔到，番入房訓就不時叫痛，展轉難眠。直到約三時終於嘔吐出黎，最初以為嘔了就好，點知之後繼續嘔吐，至早上約七時已經嘔左六﹑七次，於是帶潼潼去睇急症。拎左藥番屋企，用左肛塞止嘔藥，隔左數十分鐘，諗住藥力發揮作用後再俾潼潼食左D通粉。食完通粉休息訓覺，訓左約一個小時，潼潼又起身再嘔。我地怕起上黎又再帶潼潼出去睇私家醫生。
其實睇私家醫生無乜大作用，不過就解釋得詳細好多，我地都安心好多。
據醫生講，其實每個醫生俾既止嘔藥都係差唔多，亦都唔好對止嘔藥有太大期望，有時係要嘔清哂出黎先會好，最緊要補水。但係補水都要逐少逐少俾佢，唔可以一次過飲太多。食物就只食乾糧，例如白麵包，即使通粉﹑白粥都不好。佢仲話其實如果真係食唔到的話，唔食野都唔係太緊要，最緊要係補水。如果嘔多過十次就有機會需要去醫院吊水喇！（潼潼共嘔左九次，剛剛未超標 
）
潼潼媽就係怕潼潼缺水，潼潼每次叫飲水都叫佢飲多D，又怕佢嘔清個胃會肚餓，所以俾左通粉佢食，就係因為咁佢嘔完又嘔。由於昨晚整晚訓得唔好，早上又睇醫生﹑食藥﹑又食通粉，忙個不停，潼潼根本訓唔夠，累得不得了。既然醫生咁講，今次番到屋企就無再勉強潼潼，先由得佢訓個飽，好好休息，然後先起身食藥，隔一陣再食少少麵包。
呢次好多了，潼潼雖然都有唔舒服，但無再嘔喇！不過屋企就多左一大堆分別由兩個醫生開出，但幾乎一模一樣既藥囉！
2011年6月12日 星期日
往圖書館
又帶潼潼去圖書館喇！
其實同潼潼去圖書館既次數並唔多，一隻手肯定數得哂！少去圖書館其中一個原因係因為屋企同圖書館有一段唔近又唔遠既距離，行又幾辛苦，搭車又去唔到。另一個原因我諗係因為自己或多或少地有購書癮。不過汪培廷都建議人買書架啦！（俾我一個很好既藉口）
潼潼喜歡聽我講故事，平時都喜歡逛書店，所以去圖書館不成問題。
呢日發覺同潼潼去圖書館原來係好大既樂趣，事關個傻妹豬乜野都笑得一餐，有時甚至覺得佢故意笑得跨張黎取悅人。我一邊同佢講故事，佢一邊笑到卡卡聲，惹得身邊既小朋友都唔聽自己媽咪講故事，而好奇地望住潼潼，以為佢睇緊一本如何有趣既圖畫書，連我自己都有好大既成功感呢，隔離個媽媽問自己個囝囝要唔要姨姨講故事俾佢聽。哈哈~
以下係兩本書就係o係圖書館借番黎，兩本都係圖書館度講過，講既時候潼潼都係笑到傻左。左邊的一本「誰在放屁」我諗無幾多媽咪會借呢d咁核凸既書，哈哈~~ 不過潼潼就係鐘意，剩係讀書名佢已經哈哈大笑。
賞識教育
無意間認識了周弘的「賞識教育」
其實「賞識教育」亦唔係乜野新鮮的教育方法，一直以黎育兒專家都建議用讚賞孩子黎取代打罵。只不過周弘(的女兒)因緣際遇地係呢方面取得成就，因此就成為「賞識教育」的倡導人。
剛巧潼潼呢日亦演活了「賞識教育」呢個課題，簡直可以去拍宣傳片。
由於爸爸話過潼潼仲唔愛惜玩具﹑好好執拾，以後未執拾好既玩具就會被丟掉。上午潼潼見爸爸起床出黎，就趕快地逐件逐件執拾玩具。最初潼潼媽都不以為意，只顧睇(潼潼無興趣既)電視節目，後黎先發覺潼潼好自發地係度執拾玩具，就及是對潼潼既行為誇讚。到爸爸從洗手間出黎既時候，潼潼已經將屋入面所有既玩具歸位。呢個時候我亦順勢再係爸爸面前稱讚潼潼會自動自覺執拾。潼潼當然好高興，仲好開心咁話自己屋企好靚添 !
之後的一整日，潼潼都乖得不得了，整天的「唔該」﹑「多謝」，氹得爸爸好開心呢！潼潼既好表現一直維持到姐姐番黎。可能潼潼知道姐姐對佢無要求，所以係姐姐面前佢又開始頑皮起黎喇！
2011年6月6日 星期一
2011年6月4日 星期六
六四燭光晚會2011
今日已經係第三年帶埋潼潼去參加六四燭光晚會。
第一次帶潼潼參加燭光晚會係六四事件二十週年，加上當年曾特首講錯野，又有d大學生出黎發表六四屠城事件不曾發生既「偉論」。所以當年參加燭光晚會既人收亦突然上升。當年，潼潼只有兩歲。
廿二年前天安門的鎮壓事件，無論電視新聞﹑報紙﹑電台﹑雜誌都有報導。全港歌星起來聲援天安門學生，齊齊高唱「愛自由」。全港數十萬人上街遊行支持北京學生，遊行隊伍的人龍由中環走到筲箕灣。呢d都係新聞，你會懷疑新聞報導的是假新聞嗎?
廿多年來，中共不斷對人民進行洗腦教育。香港屬於中國領土，洗腦教育亦不少。爸爸話我地要用洗腦教育黎抗衡洗腦教育，於是乎兩年前開始都帶潼潼出席六四燭光晚會。而我既責任就係盡量給潼潼解釋當年發生過既事情。
潼潼對死亡仍未有概念，我只係好簡單的向佢提一下事情。等將來佢再大一d先再慢慢向佢講解。
訂閱：
文章 (Atom)