到深井朋友家

今日帶潼潼到深井探一位相識已久既網友小衰。我未結婚時已認識小衰，到而家個潼潼都四歲大，時間過得真係快。

朋友搬左去深井住大半年，今次先係第一次去佢屋企探佢。佢屋企附近環境都唔錯，望出去係海，好舒服，行過少少已經有個小沙灘。

個衰妹係人地屋企無耐就好唔客氣咁係咁嗌悶，於是就帶佢落沙灘行下。

潼潼除左歲幾果次落沙灘時未識驚，大勇咁走出海邊之外，之後兩年，直到而家都仲係咁怕沙。今次去沙灘，最初都係要我抱住，跟住拖住，然後嘗試慢慢行。

其實之前我都有同潼潼講一d關於去海灘玩既故事，所以潼潼對於玩沙並不抗拒，只係唔鐘意有沙入腳。於是先由遊戲開始，俾佢係沙上寫下字，執下貝殼，掟下石仔。

其實係小朋友未可以好好執好筆之前，俾佢地嘗試下沙上面寫字係一個好好既寫字練習。

難得地係沙灘上見到既笑容。哈哈~~

不過後黎潼潼俾衝到腳邊既海浪嚇親，今次沙灘之行到此為止。都係去番遊樂場玩好d。

多謝朋友小衰既招待，我地晚上去裕記食完晚飯之後再去發記食甜品，好滿足呢!