唱遊

唱遊時間到喇！

大風吹

只係一把扇，小朋友一樣可以玩得好開心呢!

學習進度

大家可以睇睇潼潼既學習 (遊戲) 進度。

爸爸成日同潼潼玩抱高高，對於高，潼潼應該有一定認識。不過對於矮，相信佢應該未明白個意思喇！

圖形配對積木

我唔太清楚潼潼而家玩呢個積木既進度係咪叫做理想（我個人黎講就緊係滿意啦），不過大家又可以再見識下潼潼點樣發脾氣。

不准拍攝

潼潼唔鐘意我影佢架，所以其實要拍潼潼都好難。睇下！潼潼知道我又影佢，佢既眼神幾咁怨恨同不滿。

忙 + 病

好耐無UPDATE個BLOG。因為潼潼媽無事忙，無時間寫BLOG；亦因為潼潼病左，所以都無潼潼既最新報導。

4月10號(星期四)既零晨三點幾，起身幫潼潼蓋被時發覺潼潼手腳燙熱，感覺潼潼係發燒。即刻成個人醒哂，幫潼潼探熱，叫醒埋姐姐起身幫手餵藥。到朝早再帶潼潼去睇醫生。但係幾日後情況一直唔穩定。燒退左以後又再燒，之後仲有咳添。

到4月13號(星期日)再帶潼潼去睇醫生，加強左藥力，但係咳卻更加厲害。潼潼咳到上氣唔接下氣咁，真係睇見都替佢辛苦。

4月15號(星期二)，好似做戲咁，情況急轉。上午潼潼仲咳到死死下，到下午突然明顯好轉無乜再咳。真係神奇。 之後幾日都慢慢好過黎喇！

點都好啦，始終健康係最緊要。希望潼潼以後都健健康康。

 

爬凳仔

潼潼識得「擔」凳仔爬窗喇！D變臉功夫仲好了得添。

我嘗試左幾次想拍低佢自己「擔」凳仔既過程，結果．．．．又被發現喇．．．．

浣熊

星期四香港黎左隻浣熊。

呢隻浣熊認真夠兇，佢係香港有紀錄以黎最早既一個三號台風；亦都係今晚令香港發出左最早既一次黑雨警告。

今晚潼潼爸一早買左「飛」同潼潼媽去聽演奏會。今日整天都係度落雨，如果唔係一早買左「飛」，真係唔係好願出街。去到尖沙咀，真係寸步難行，除左係因為大雨之外，仲周圍都係大水氹。以為行隧道可以避下雨，點知入面一樣水浸。行去文化中心既路途當中，都經過唔少「水塘」。

好彩走既時候停左雨。番到屋企先知原來我地係街度走既時候係黑雨。

15個月

潼潼一歲三個月大喇！8隻門牙仔都出齊喇！仲開始出緊其它牙仔添！唔知係咪出牙既關係，潼潼流口水既情況真係好嚴重．．． 至於體重呢？好似無乜點重過，只得20磅。呢個當然啦，而家個衰妹都唔鐘意飲奶，越飲越少。

15個月既人仔會既實在太多，多到有時自己都太不以為意。儘管試下寫寫先。

• 會哼歌仔，而家可以跟住音樂成隻歌仔哼出黎。


• 會講BB話，真係望住同你講野，只係我聽唔明佢講乜。


• 鐘意爬高爬低。識得用各種傢俱/玩具幫自己爬高，做出各種危險性動作。


• 會發脾氣，裝喊。

講到發脾氣，潼潼越黎越叻，仲會識得先發制人係度扮喊，近黎仲好鐘意訓地添！

弊喇！開始進入艱難期。所謂養一個小朋友唔難，最難係要教。

 

爬梯

睇下呢個百厭精，姐姐爬梯上去搵野，佢又爬埋一份係下面阻住哂。

跟住姐姐番落黎之後佢仲自己爬上去玩添！

添置書桌

呢日為潼潼購買左一張小書檯

睇過唔少育兒書都有建議為小朋友添置一張檯，俾佢地習慣坐定定去做一件事，無論係睇書，還是只係玩都可以，咁樣就可以訓練佢地既專注力。

本來睇中左荷花入面既一套檯連椅，可惜佢無貨。咁有一次行商場既時候，其中一間店鋪入面擺左呢張可以用埋黎砌積木既檯，見潼潼係度玩得好開心咁，所以忍唔住改變主意買左呢張檯。

其實有心想買檯仔俾小朋友以訓練佢地的話，其實我唔太建議買呢張檯。因為張檯本身中間個檯面係可以打開，亦都表示會有隙縫。好似今日俾潼潼係上面食早餐既時候，就會有食物掉左落去，都幾唔方便架！不過潼潼媽錫（縱）囡囡，咁就無辦法啦！

我愛將軍澳

潼潼媽由出世到長大，一直都住係北角。直到幾年前想買樓但係又無乜錢，所以先睇中左將軍澳ｄ二手居屋夠平而搬左入黎將軍澳住。

初初搬入黎都有ｄ唔慣，覺得呢度太辟靜。不過而家就越黎越喜歡，因為空氣同居住環境都唔錯。尤其是係春天到黎既時候，會見到屋企樓下同附近路邊都開滿杜鵑花，真係好靚架！仲有我好鐘意睇到樹木剛發嫩芽既青綠，真係睇見人都醒神ｄ。呢一區越黎越旺，希望呢一番景象一直能夠保留。

另一樣令我喜愛將軍澳既，竟然係黑夜。潼潼媽係唔鐘意晚間活動架，不過就開始喜歡將軍澳既黑夜。事關我發覺而家係巿區真係見唔到「黑夜」，周圍都係大光燈，就算夜晚都映到個天非常光亮，我覺得係太過違反自然，令人唔舒服。

喜歡將軍澳既黑夜會睇到星星。不過我諗遲ｄ都好難話得埋．．．

大花面

咦？點解潼潼變左大花面既？

原來潼潼玩緊插筆蓋。

俾姐姐再加多兩撇鬍鬚。潼潼照鏡後，對呢個新造形表現得極度厭惡。

再加上專人指導既伸脷動作。掂哂！！

有無又再覺得呢個媽媽好變態呢？成日將個囡當玩具咁玩！

繼續忙碌

呢排依然忙碌，但係唔知忙乜野，總之就係好多時都夜番屋企，陪唔到潼潼。有時番到屋企，知道潼潼晚上十一點幾先訓覺，我就會諗潼潼係咪掛住媽媽，想等媽媽番黎所以夜訓呢？哈哈~ 呢個媽媽認真夠阿Q。

影左既相，拍左既VIDEO，希望可以係假期全部upload好，到時會backdate番個日期。潼潼粉絲就要小心唔好miss左喇！

安全著地

為左應一應2008北京奧運，潼潼都黎表演一番。 睇下潼潼呢一跳似唔似體操選手？跳！（其實係跣係岩）安全著地！好穩陣！十分滿分！

哎呀！第二跳失敗左添！唔緊要，依然係咁開心！好！！努力再黎過！