雖然潼潼出世係比較輕，只得5磅11安士，但係咁多個月黎，都算食得肥肥白白。而家已經兩個幾月大，原本以為會有十多磅重。點知星期一番健康院檢查，磅重只係得3.89kg，即係8磅9安士重。實在太輕喇！
本來佢出世時輕，但係都仲係標準以內。但係而家直情跌出標準曲線以外，實在太差勁 
。
最大問題係，o係番健康院檢查o既前一晚，我地先發現一直用錯誤既方法沖調奶粉。我地係用日本奶粉餵潼潼，但係原來日本奶粉o既沖調方法係同普通奶粉唔同。如果用番一般奶粉既沖調方法，其實係略為將奶粉調稀左。雖然分量相差唔會太大，但係而家潼潼唔夠重，我就更加緊張。都怪自己太過大意，累潼潼體重未能跟標進曲線發展。呢個媽媽實在唔合格。
話說我潼潼頭一個月都係用母乳餵哺再補奶粉o既，但係一直覺得bb唔夠飽而成日扭計成日喊，自己出街又好唔方便，會有谷奶情況導致發燒，結果係我同bb都好辛苦。加上就黎放完產假，所以一個月後決定轉用全奶粉而停止母乳餵哺。但係其實我亦好享受用母乳餵哺bb時o既滿足感同親密感覺，所以係停乳後一個多星期，我曾經偷偷的讓bb吸吮。
原本以為只係俾bb滿足一下，只係吸啜幾下罷了。點知bb一直啜到唔肯停，我又怕俾人發現我偷偷"餵"bb，唯有係bb未自動"放口"o既時候強行將佢抱開唔俾佢吸啜乳頭。點知咁就大件事喇！bb即時大喊，仲要喊得好可憐，好似俾人搶走左心愛既玩具一樣。工人同老公都唔知咩事，只知bb喊得好犀利，唯有不斷哄佢。
我見佢喊得咁犀利咁可憐其實都好心痛。係果一刻先明白咩叫做「愛你變成害你」。係呢件事上我好好的上左一課，就係做左媽媽之後，做事就唔能太過自私，只顧個人既感受同慾望。咁樣做可能反而會傷害左自己疼愛既寶寶。
曾經聽人講過，當人老左之後就會回歸番好似孩童時候一樣：樣樣事都不懂，需要別人照顧，需要別人哄。雖然如此相近相似，但小生命卻比老人家幸福得多。
今日到安老中心探望完老父之後，係歸家途中碰巧睇見善寧會的一張海報。上面提到：出生時萬千寵愛，年老時亦可以活得矜貴。佢呢兩句語句，令我有好深既感受。
囡囡剛剛出生，我完全感受到果種「萬千寵愛」的幸福。身邊親戚朋友都送上禮物同關心。
至於老年的矜貴嘛？我諗無幾多人可以有幸感受到。就是外表乾燥起縐多斑o既皮膚，已經不比幼嫩細滑白晢的吸引。
係我臨近生產既時候，老父不幸中風，當時家人怕我受不了而將事情隱瞞，直至病性好轉先輕描淡寫的提過，直至後期我先知道當時情況原來頗為嚴重。而家老父情況雖然開始好轉，但亦令人感慨，一生勞勞累累，到老年退休之時仍要受住病患既痛苦。可幸o既係，我地三姐弟還算稱得上有一點點孝義，唯有盡量令老父能活得矜貴。
熟睡 
捽面 
偷看 
伸懶腰
笑!!!
