重要時刻

今日去幫囡囡拎出世紙，令我諗起約三年紙果張結婚證明書。見到兩份封套，令人感觸良多。彷彿人生中最重要o既時刻都已經經歷過，令人喜悅雀躍o既都已經嘗試過。下一個重要時刻，就只剩下「死亡」嗎？

出世紙

今日天陰陰仲落住微雨，但係媽媽都去街街。原來係去幫我拎出世紙。你地睇下，呢張就係我張出世紙喇！我係潼潼呀！

 

 

5週大

我已經出世五星期五日喇。雖然我仲係好細個，但係呢幾日都一樣好頻撲咁四周圍去拜年。直到年初四大家都要番工我先有得休息咋。

不過今日我都番左健康院檢查。你估下我而家幾多磅。我已經比出世果陣重左兩磅喇，我而家係3.52kg，即係7磅12安士。健康院D姑娘話我進展唔錯。

到左夜晚等爸爸放工番o黎，佢就帶左我落去打6合1既預防針。媽媽話怕睇到我俾針拮，所以要爸爸陪喎。其實都唔係好痛唶，我嗌左兩聲又訓著左lu。聽講呢隻6合1預防針o既副作用會比係健康院打果d輕微好多，唔怕紅腫發燒，而且注射既針數亦較少。為左令我受少d苦，所以雖然要俾多d錢，爸爸媽媽都寧願帶我落私家診所打預防針。

爸爸媽媽真係好錫我架!

2月14日 -- 受難節

餵哺母乳，係我對囡囡o既最強秘密武器。每次囡囡扭計果陣，只要我餵佢，佢都會收聲唔喊，兼且好快訓著。其實好多時佢都未必係真係要食奶，而只係要吸啜時o既滿足感。

係餵哺母乳其間出現好多問題：衣著問題，囡囡食奶時間同份量o既問題，外出時谷奶的問題，仲有將來番工後時間上o既問題。咁多問題之下，我決定停止餵哺母乳，但由作出決定一刻開始，就已經感到依依不捨，我諗呢種感覺男士會好難明白。當我給囡囡餵母乳o既時候，見到囡囡係度吸啜會有一種滿足感。我覺得能夠同囡囡如此親近，兼且俾到佢心理上同生理上o既滿足，係我做媽媽的榮幸。

呢幾日以黎我一直以母乳同奶粉交替餵囡囡，一直覺得無咩問題，同時亦開始飲豬潤水，打算斷奶。到左尋日，我先係網上睇到原來斷奶係唔可以同時用母乳餵寶寶，而係需要完全停止對乳頭o既刺激：包括泵奶﹑擠奶以及餵哺。於是我就落左樓下葯房買左回奶茶，同時亦停止對囡囡餵母乳。可惜到晚上，惡夢開始喇。我又開始出現谷奶o既情況，人開始發燒，感覺好凍，身體不停地震，乳房亦痛到唔想有任何動作，連換衫都似乎係一件難事。另外，我係呢刻先醒覺原來完全停止母乳餵哺唔單止係我一人受苦，囡囡亦因為唔習慣，得唔到吸啜同摟抱o既滿足感而整天哭鬧，喊得聲嘶力竭，聲都沙埋，未有一刻能夠熟睡。我睇見咁o既情形，心裡是一陣心痛加一份愧疚，見佢實在可憐。但係我又因為胸前極痛而唔可以抱佢一下。呢一晚唯有將佢交俾工人照顧，但係仍然聽到佢不停地喊，我就關上門休息唔敢出去望佢一眼，事實上我亦幫不上甚麼。

經過一晚休息，今日情況先開始得到改善，囡囡亦開始肯靜靜訓覺。

尋晚我老公講左幾句說話我都幾認同。「將來邊個話要哺母乳我實叫佢唔好餵。開始果陣又辛苦，連唔餵果陣都咁辛苦。」的而且確，雖然話母乳對bb同媽媽都有好處，但係對於我呢講，係餵母乳呢段期間，我同囡囡都受唔少苦。

 

p.s. 本來今晚打算同老公出外食飯算係慶祝一下情人節亦被逼取消，真係超級無奈...

貓貓狗狗

令我諗起羅文首名曲：波斯貓

「睇下我個睡姿似唔似一隻貓？」

金狗?金豬?

不知何故，早幾天囡囡早上起來總係鼻塞塞，弄得呼吸不順而發出類似豬叫o既聲音。

『雖然我趕唔切做金豬，但係我呢隻金狗囡都識得扮豬叫架』

熟睡的原因

餵哺母乳o既技巧原來比我想像中更高難度。經過谷奶o既痛苦之後，我唔敢亂食補充母乳o既食物，包括魚湯同鮮奶；自己亦都懶左，唔會好似之前係醫院咁堅持用兩個小時餵哺一餐；健康院o既姑娘亦都話應該每餐只用半小時餵哺。種種原因之下，母乳量減少左。囡囡總是吃得不夠似的，每天都在哭哭啼啼。為左係晚上有覺好訓，終於退一步去買奶粉 - 這正正是惡性循環，奶量更加少。

 

呢幾日好矛盾，一時想盡辦法增加乳量繼續餵哺母乳，但見到囡囡捱餓o既樣子，又想轉用全奶粉餵哺。但係我每次抱住囡囡餵母乳果陣幸福o既感覺好強烈，令我對餵奶粉感到內疚。

 

呢段時期雖然內心掙扎，但係我仍用盡辦法嘗試增加奶量，亦似乎稍有成績。今日囡囡整日都睡得甜，總是不願起來似的。究竟係因為奶量足夠食得飽而睡得甜，還是因為佢訓左係我同老公o既雙人床上特別有安全感呢？

「你睇下我訓得幾甜」

 

「唔好攪住我訓覺啦」

 

「食飽再訓過」