人生旅程

 

即將踏入人生o既另一階段 - 生兒育女。

 

睇住自己一步一步咁行呢段人生路，有時會有一種驚恐o既感覺，概歎時光流逝。由少至今，我都好怕面對死亡，只係小學o既時候，已經會因為自己胡思亂想而暗地哭起來。但成長係每個人必須經過；死亡係必須要面對o既事實，唔知幾時我先學會接受呢？

 

o係呢段等待小生命出現o既同時，原來老父曾經入院，只係身邊o既人見我預產期將至，怕我擔心而無將事情講我知，直至而家老父o既情況穩定落黎先將消息通知我。一段生命o既開始，一段生命o既結束，我實在參透唔到生命o既意義何在。我只係知道我唔想見到死亡，唔想見到永遠o既離別，我怕捨不得，我替死者感到不值，勞累一生不知為何，除了病苦，最終一無所有。

 

可惜，隨住年紀漸長，我終會踏入呢一個階段 ─ 不斷面對死亡，見住自己身邊o既人一個一個地離去..... 甚至乎係自己離去。我真係想將時光凝住，唔希望見到死亡帶o黎o既離愁別緒。