嘔吐大作

昨晚潼潼伏係我係姐姐身邊「恰」眼訓既時候嘔了一灘，當時潼潼媽不以為意，以為只係因為潼潼伏係度訓令胃酸倒流所致。所以整理好一切之後就帶潼潼去訓覺。

睡至午夜兩時多，潼潼間間斷斷的邊睡邊喊，潼潼媽心知不妙，心想潼潼可能係肚仔痛，帶左潼潼去廁所之後，佢依然扭計，於是我地幫佢搽左葯油同埋食左「樋屋」之後抱住潼潼哄佢訓。突然間... 吐~~~~ 潼潼媽身上滿是潼潼當日既晚餐 - 米線。　潼潼媽大叫爸爸同姐姐黎幫手，潼潼就嚇得係度不斷喊。手忙腳亂的整頓好潼潼同媽媽後準備再訓既時候，潼潼又再次係床上吐了一點點．．．　

今朝起來，潼潼有點肚瀉，吃過一點點早餐又吐回來，所以爸爸帶左潼潼去睇醫生。醫生話可能係受輪狀病毒感染，而非一般的食物引起的腸胃炎，仲話呢排好多小朋友都有類似情況。唔知會唔會係因為早兩日租單車玩既時候單車唔乾淨而受感染呢？我上網睇左一點資料，發覺而家無乜野可以做，唯一係好似普通腸胃炎一樣，等佢自己嘔清痾清。

今日潼潼媽放工番屋企，見到平時病既時候都一樣活潑既潼潼沒精打彩的，真係好少見佢病得咁辛苦，希望佢可以盡快好番啦！

騎單車

這是名符其實的「騎」單車，而非踏單車。

年初三我地一家跟表姨一家同到姨媽屋企拜年，然後到附近單車公園踏單車。潼潼呢？正是「未學行，先學走」，連三軜輪車都未會踏就坐上正式的單車。別小覷潼潼，佢係好正經地眼望前方﹑腳放在腳踏上﹑認真的在「騎」單車呢！

最後還是換上兒童的三輪車，而且潼潼對呢架米奇三輪車一見鍾情，坐左上去之後就唔肯換第二架。

下面呢個係潼潼最近常用的招牌式笑容，每次叫佢望住鏡頭笑，佢都係擠出一副瞇哂眼既笑容。潼潼，其實你知唔知呢個笑容笑起上黎唔係咁靚咋！

賀年煙花

大年初二既節目緊係晚上去睇煙花啦！我地原打算去尖咀既中間道兒童遊樂場睇煙花，可惜原來果度整個平台係屬於封鎖區域。潼潼見住個遊樂場又無得入去玩，好失望咁係出面望左好耐。

上次睇煙花係十一國慶，果陣潼潼俾D煙花聲音嚇到係咁喊。相距約四個月，今次睇煙花潼潼無再喊喇，不過後黎就係咁嗌住要去尿尿。唔知佢係真係想尿尿定係想借尿遁呢?

睇完煙花走喇！嘩！好難得可以係平時繁忙既馬路中間走呢！

去醫肚先。

哈哈~　見唔見到前面有幾多張紙巾?潼潼食野真係食到好污糟架!真係嚇死人。有時真係多得有姐姐，我先可以係咁惡劣既環境下，依然好ENJOY咁為潼潼拍照。如果要我收拾殘局，我未必可以咁輕鬆咁面對潼潼既「惡行」喇！

爸爸唔夠喉，再買薯條。睇下潼潼又為食喇！

再多得薯條既利誘（又用呢招，潼潼媽太差勁喇），成功為潼潼拍下咁有節日氣氛既照片。

忙碌的年初一

恭喜發財!!!

每年既年初一都係非常忙碌，節目係由朝到晚。今年仲威，因為嫲嫲同婆婆都買左新衫俾潼潼，所以潼潼仲要中途換衫添。

潼潼今年好醒目咁識請請，識講恭喜發財，新年快樂等等，只可惜全部都要係利誘下先肯做。　潼潼媽一直反對用利誘方法去拎潼潼做出應有既禮貌行為，但礙於大年初一呢D喜慶節日，都破例一次。

今日行程包括去沙田上嫲嫲屋企拜年，然後番天后到舅公屋企團拜

上北角寶馬山表姨屋企

然後再同表姨﹑姑婆番北角公公屋企，再一齊晚飯

全日行程潼潼無訓過，不過都無扭計，真係叻女。

年卅晚團年飯

年卅晚去嫲嫲屋企食團年飯喇！呢幾日都好凍，我地個個包到成隻糉咁。

吃過團年飯，準備開開心心渡新歲喇！！