聖誕留影@德福

今日既行程係MEGA BOX同埋九龍灣IKEA。出發喇!!影番張型仔相先。

有無發覺呢張相既潼潼有乜唔同呢?潼潼係落車無耐，步行至MEGA BOX途中PK左呀，個咀撞到落D石屎路度，當堂留哂血係咁喊，連口入面都係血，我地都唔知係佢出面流血定口入面流血，真係嚇死我地呀!!幾驚佢撞親D牙仔。不過後黎見佢好似都無乜野，不過就個咀仔腫左，同埋無乜心機食野囉!!

行完MEGA BOX就番九龍灣IKEA，本來想幫潼潼物色一張梳化床 (發覺放唔落兒童床)，不過最後都係睇唔岩，就順路過德福行下。

每逢節日，德福呢個商場既佈置真係好唔錯。各位媽媽真係不妨帶小朋友過黎影下相。

聖誕留影@海港城

近黎潼潼媽係公司做到天昏地暗，真係做到個人都癲癲地。潼潼媽唔理三七廿一，就趁呢日放工，約埋爸爸同潼潼一齊出黎尖沙咀影相，工作既野就暫時丟低唔理喇！

最初去到海運果邊，潼潼仲係心情大好，難得地笑住跟我地影左幾張合照。

不過好快潼潼又回復佢一貫作風 - 見鏡頭就避，所以最後都無影到幾多靚相。

去海運既反斗城度逛逛，睇下潼潼彈琴都彈得幾投入喎!

好消息

潼潼媽係屋企個白板上面寫上「好消息!!!」三個大字，究竟係咩好消息?

對於潼潼入讀N1，潼潼媽早已打定輸數，已在放棄狀態。點知而家收到幼稚園既面試信，潼潼媽好似中左六合彩(安慰獎)咁開心呀！雖然只係面試,未必一定入到，更加唔係咩名校，但起碼叫左有個機會可以俾潼潼學習下過羣體生活嘛！

用牙羔刷牙

潼潼一向都係用水刷牙仔，我地見佢咁鐘意學我地拎牙羔羔用，星期日買左兒童可吞服牙羔俾佢用。星期一晚第一次試用，但係佢似乎就唔係咁鐘意用牙羔刷牙。

腳踏車

多謝茄茄送出三輪車一架，今日拎左番屋企喇！雖然潼潼對腳可以掂到踏板，但係唔知未夠長定未識踩，所以都未踩得郁部車。

潼潼對車後面個兜兜好有興趣，仲係咁對住個兜話「痾尿」添！