一齊去旅行

「媽咪同嫲嫲﹑姑姐去旅行好唔好呀?」

「唔好!」

「咁潼潼同嫲嫲﹑姑姐去旅行好無呀?」

「唔好! 我要同媽咪一齊去。」

「咁潼潼﹑媽咪﹑爸爸同嫲嫲﹑姑姐一齊去旅行好無?」

「咁姐姐呢?」

「咁姐姐要放假同朋友玩嘛! 」

「不如我﹑媽咪﹑姐姐同嫲嫲﹑姑姐去旅行。」

「咁爸爸呢?」

「爸爸搵佢啲朋友玩。」

用功完成COPY BOOK

一本A至Z既COPY BOOK，K2既小朋友要用幾多時間完成?

對於奮進型父母同小朋友，只係一件極簡單既工作，對於我家潼潼，卻絕非小事，因為潼潼係活躍型小朋友，多坐一會都會無耐性。今次爸爸就俾左一項任務俾潼潼，要佢係一個星期內完成爸爸俾既功課 - 一本COPY BOOK。

估唔到既係，潼潼呢兩日好用功，一有時間就自動自覺拎本COPY BOOK出黎，坐定定咁努力寫，最後用兩天時間完成，而且一點都唔馬虎。



呢件事俾左父母一個點樣既訊息?

要相信孩子，唔好標籤自己既小朋友 - 不過真係好難改....

好勝

公園裡既攀爬組合通常都有呢類攀爬架，讓小朋友運用臂力，一格一格的逐步向前，從一邊去到另一邊。

潼潼最近都喜歡玩呢個玩意。呢日就特登叫埋婆婆一齊去公園，要「表演」俾婆婆睇佢爬綱架。

潼潼試左好幾次，都係半途跌左落黎，唔能夠完成全程共6格既綱架。其實我知道佢已經對手好「支力」﹑唔夠力，但係佢真係好硬頸，唔肯停低落黎休息，不斷賞試再賞試。

潼潼唔肯放棄當然係好事，但係另一個角度黎睇，唔輸得亦係一個弊處。果日天氣好熱，但婆婆同我都著住長衫衣服，曬住好辛苦。我地提出要先番屋企，但潼潼都唔俾，堅持要婆婆睇元佢完成爬鋼架，後黎仲哭鬧起黎添。

我捉左佢去另一邊同佢講解之後，潼潼要求「試多一次丫!」

好啦! 我稱讚佢肯同我地商量而唔係用哭鬧既方法，跟住俾佢試多一次。本來我同婆婆都唔期望佢會完成全程，點知，呢一次然俾佢成功左，令我同婆婆都感到驚訝。

真係一個好勝既小妹妹，以後應該點樣運用佢呢個優點同缺點去教育佢呢?

好玩遊戲 - 我家之最

呢個晚上，同潼潼閒聊時發現一個好好玩既「遊戲」。

最初係問潼潼:

「邊個最乖?」

「邊個最曳?」

「邊個最鐘意喊?」

呢d都係父母最鐘意問﹑用黎椰榆小朋友既問題。不過問問下，覺得有趣，就越問越不著邊際，發現小朋友既答案真係好有趣好好笑。

「邊個最肥?」

「(笑) 咪你(媽咪) 囉! 」(好直接呀)

「邊個最有錢?」

「爸爸!」

「點解?」

「因為爸爸成日係你度拎錢。」

「邊個最窮?」

「媽咪!」

「因為成日俾爸爸拎哂錢。」

哈哈~~ 小朋友睇野好表面，唔會明白大人間o係金錢上既分工。

聽聽小朋友眼中既世界，真係好可愛好有趣呢!

給老師的禮物

復活假期將完結，潼潼為班主任準備了一份禮物 - 用心的包裝 - 雖然包得唔靚，但係係潼潼自己親手包既。



潼潼媽細個既時候對老師雖然尊敬，但卻避諱三分。而家o既小朋友同老師之間可以咁親近﹑咁親切，其實都係幸福既一種呢!