潼潼媽溜冰

大件事喇！！潼潼媽去溜冰！！

溜冰唶..... 有幾大件事? 大件事在我之前都講緊絕無一點運動細胞，運動項目無一樣精。呢次係我做左幾十年人第三次溜冰? 第四次溜冰? 肯定阿囡已經落場多過我啦! 你話而家d細路幾幸福呢!

今次係潼潼第五次溜冰喇! 依然係踏步地走，但好快又一圈走番嚟。仲經常係我身邊碎碎唸，提醒我學溜冰要跌，仲話要幫我跌添! 所以我真係好怕佢，又怕自己跌親會撞倒佢。

不過潼潼媽都算係咁咯(認叻)，之後都可以自己慢慢踏完一圈又一圈，無跌過架!

用心做家課

未番到屋企，潼潼已經打電話俾我。

「媽me，你唔駛檢查我啲功課喇！我已經檢查咗，做得好整齊好靚呀！」

「咁我番嚟欣賞下得唔得呀？」

「好吖！」

咦？今次又真係寫得唔錯喎！媽咪唔記得影相，就第二日影番張相補數啦！反正寫既生字都係一樣唶！

傻大姐

放工番到屋企，潼潼怪聲怪氣地唱緊廣告歌。唱唱下仲手舞足蹈添。


潼潼而家五歲。其實呢個世代，好多五歲既小朋友已經好老成，識好多嘢。偏偏潼潼就仲好似BB咁，好多嘢都未知。其實我唔知咁樣算唔算好事，不過見到佢咁開心，做媽咪就覺得難得糊塗，傻下無妨啦！

爬得下

你咪話，潼潼媽細個果陣真係一舊木，完全無運動細胞，連打羽毛球都唔掂，體育堂係我最怕你既學料。

玩呢個攀爬架，對於我黎講就唔駛諗啦！不過估唔到潼潼都爬得兩下喎！（姐姐話佢最多可以爬到四格）對於潼潼媽嚟講佢已經好叻架喇！