潼潼已經四歲多，但平時講野依然係沒頭沒腦的。不過駁咀的說話卻好叻。
2011年5月27日
潼潼跟姐姐係商場入面邊行邊玩，跌跌碰碰咁。就快出商場時，媽me提醒潼潼一句，係街上走要小心，唔好再玩喇！
潼潼轉向姐姐話：媽me話唔好再玩呀！你又要同我玩！
*******************************************
同日晚上番到屋企，潼潼玩緊當日買既搖搖。爸爸話早知潼潼唔識玩搖搖架啦，但係又要買。
潼潼：咁試下加嘛！試下唔得咩？試下唔好咩？
2011年5月28日
潼潼好多時有人入左洗手間之後佢先話要去尿尿。今日又係咁，媽媽故意係洗手間入面打趣：無得去呀！！其實就趕緊出黎。
潼潼媽開門企係門口：無得屙尿呀！
潼潼：咁你開門做咩呀？
潼潼上芭蕾舞班已經一年喇。初初俾佢學芭蕾舞係覺得佢鐘意跳舞，想俾佢玩下，所以揀左間平平地既俾佢試下先，點知一跳就跳左一年 -- 雖然期間潼潼都曾經話過唔想再學。
上左一年芭蕾舞班，但係堂上經乎都係唱遊形式地練習一d手部動作﹑跳躍動作等，可以話一隻舞都未跳過。所以潼潼媽打算幫潼潼轉另一間芭蕾舞學校。好巧合，竟然係呢個時候係屋企附近差唔多同時開左兩間舞蹈學校 - SDM同小公主。
雖然SDM出名好多，亦好多演出機會，不過爸爸嫌佢商業味太濃唔係咁鐘意，所以我幫潼潼報左另一間舞蹈學校。
停左兩三個星期無上堂，呢日潼潼就著好整套芭蕾舞衣去上堂，似模似樣。而潼潼呢，見到套衫咁靚，未跳已經好開心啦!
跳完就仲開心，因為呢度真係有得跳下舞。連潼潼都話唔上以前間跳舞學校喇!
老師對潼潼既評語係:
記性好。事緣潼潼上堂時講到佢岩既話題時佢就講過不停，老師提醒佢跳緊舞唔講住，到跳完既時候潼潼竟然提老師佢剛才未講完....... 
其實咁唔係記性好，係多野講唶。
潼潼多野講，反而令我擔心佢上堂時唔守秩序，但係老師話只要同佢講清楚，佢就好清楚乜野做得，乜野唔做得。哎呀! 差d唔記得潼潼好叻係人地面前扮乖既添! 
老師話潼潼好鐘意照鏡，會越坐越近塊鏡度
。係呀! 潼潼係好貪靚，兩歲已經識得照鏡喇!
最後老師話潼潼轉數快，我唔知老師係點樣睇得出潼潼轉數快，我只係即時答左句: 係呀!駁咀好快! 
呢日係佛誕假期，有舅父車我地去沙灘。本來諗住去石澳架，不過太多人改左去大浪灣。
大浪灣果然好大浪，今日天氣好好，不過依然掛起紅旗，唔適宜游水，不過就好多人滑水。
天氣好得不得了，熱到傻，想赤腳走係沙上都唔可以。我揀左一個樹蔭俾潼潼玩沙。
有無見到潼潼一樣著住對水鞋。無辦法啦，經多人分折，認為潼潼係有輕度潔癖，所以好怕沙。但係為左避免潼潼對沙灘太抗拒，所以暫時由得佢著住水鞋玩住先。希望試多幾次之後佢會習慣。
潼潼而家好怕自己一個人玩，成日都話想人陪佢玩。佢係沙灘玩左無耐就搵到個姐姐陪佢一齊玩喇 ! 不過就累到個姐姐後黎俾佢媽咪鬧，因為個姐姐同潼潼玩而唔願陪自己個妹玩。個阿媽鬧小朋友鬧得好兇呀! 真係嚇死我...... 
一於扮無知企埋一邊。
潼潼就玩得幾開心，玩到唔願走。
呢日酷熱天氣警告呀! 仲要係下午兩時多到達，實在曬得太辛苦，所以留左個多小時就走咯。
今次輪到潼潼學校既家長教師會攪旅行，地點係元朗大棠荔枝山莊。
有校車接出接入，車程都要成個鐘，所以平時真係無乜機會去呢d地方架。
去到目的地，行左一陣就見到個繩網陣。潼潼走埋去望左一眼，跟住聽到大公主一句：「好污漕呀！」跟住就走開左，真係俾佢激死。
不過除左呢個繩網陣之外似乎無乜玩樂設施，最後潼潼亦係爸爸既陪同下挑戰繩網陣喇！
努力努力大踏步！！
之後再行前少少就見到有山羊。潼潼最初都好怕，唔敢接近ｄ山羊度架。不過係媽媽協助下，試左幾次餵山羊之後潼潼已經唔驚喇！
終於夠膽自己埋去食羊羊喇
呢日既午餐係BBQ。嘩!真係熱死人，小朋友胃口細又無乜耐性，好快已經唔食野，個個掛住搵班老師。我見到成班小朋友個個跟爸媽，反而圍住個老師，真係替老師辛苦。
天氣好熱，食杯雪糕消消暑先。呢杯雪糕係校長送俾潼潼架，佢大讚潼潼乖。
係呀!我係老師口中都知道潼潼好乖，不過係o係學校乖囉! 番到屋企變大小姐就唔同哂。呢次仲俾老師睇到潼潼扭計要買肥皂泡而係度喊添! 連老師都講笑話睇到潼潼真面目咯。
