好野! 潼潼拎左護照同身份證喇!可以帶潼潼周圍玩喇!(其實都未有計劃)
估唔到而家本特區護照原來咁精美。
上面有一頁有潼潼既鐳射打印相片以外.....
仲有就係原來內頁每一版都印有唔同既花朵同各種唔同寫法既「華」字。
咁靚既護照,唔用只係欣賞或留個紀念都唔錯丫。哈哈!
(好彩未剃頭前幫潼潼影左證件相,唔駛連護照都做光頭妹)
好野! 潼潼拎左護照同身份證喇!可以帶潼潼周圍玩喇!(其實都未有計劃)
估唔到而家本特區護照原來咁精美。
上面有一頁有潼潼既鐳射打印相片以外.....
仲有就係原來內頁每一版都印有唔同既花朵同各種唔同寫法既「華」字。
咁靚既護照,唔用只係欣賞或留個紀念都唔錯丫。哈哈!
(好彩未剃頭前幫潼潼影左證件相,唔駛連護照都做光頭妹)
爸爸嫌潼潼頭髮太稀疏,聽聞剃過頭髮之後頭髮會生得較濃密,就決定幫潼潼剃頭。
好可憐啊!整過剃頭過程潼潼都係咁喊。見住自己d頭髮慢慢無哂,係咪好唔捨得呢?潼潼媽見到潼潼係咁喊都好心痛!
還好既係,剃完出黎既效果都唔太差。婆婆仲讚潼潼剃完個頭之後,顯得更眼仔碌碌好可愛咁話添。
(潼潼媽替潼潼影完光頭照之後相機就壞左喇!)
上次去完大角咀playroom之後,每次潼潼自己睇番所拍既video都好興奮,所以一直都好想再帶潼潼去玩,只可惜交通實在太唔方便。
今日就趁番北角娘家,路程相對比由將軍澳出發的近,所以就決定再帶潼潼去果度玩。潼潼一去到見到個playroom已經好興奮,排隊等候時已經顯得非常不耐煩。我地諗住趁有時間,就俾潼潼食d野先,點知佢就只掛住玩唔肯食。
玩完一節之後,我地再等下一節既遊戲時間。呢個時候,潼潼終於識得肚餓喇!拎住個包包大啖大啖咁咬。
見到潼潼狼吞虎嚥個樣真係好攪笑。
喇!潼潼又出招喇!
潼潼真係好犀利,拎住任何物件都可以當電話放係耳仔側邊講。今次既目標係一包濕紙巾。
又玩足兩節,潼潼開心哂啦!
上星期帶潼潼黎左呢個距離坑口地鐵站大約5分鐘路程既新公園玩,唔知呢個公園叫乜名呢?
潼潼鐘意玩滑梯,而家基本上可以放心等佢自己上樓梯
自己玩滑梯 (但係潼潼媽依然會係側邊睇實)
呢個公園既攀架都有好多類型。潼潼對於呢度既攀架都好有興趣
樣樣試下,玩得幾開心。
今日再同爸爸一齊去呢個公園,潼潼爸爸好欣賞呢個公園入面既設施。
呢個公園入面既洗手間真係做得好體貼。由於將軍澳係個新區,區入面好多小朋友,所以呢個公園既洗手間入面都有唔少設備幫左爸爸媽媽們好大忙。除左男女洗手間都會有比一般公眾洗手間闊落既換片區,仲有小朋友坐廁之外,竟然仲有一個可以方便爸爸媽媽去解決既時候,旁邊有個可以放小朋友既坐椅,咁就可以睇住小朋友唔怕佢周圍去啦。
呢個洗手間入面仲有冷熱水設備既更衣室。希望呢d設備一直都可以保持得完整乾淨咁就好喇!
PS 特別鳴謝潼潼爸幫我深入洗手間偷影。
上個星期六﹑日天氣都唔好,無乜帶潼潼出去玩。今日端午節假期天氣比較清涼,舅夫又得閒,就即興車我地去大拗門燒野食同放風箏。
潼潼媽即刻去買野食,種類同數量都唔係太多,岩岩好。
帶埋沙灘蓆,潼潼可以坐埋一邊等食。
仲為潼潼預備左維他奶,佢飲左好多呢。
食完野跟住我地去放風箏,不過呢個時候潼潼已經訓左lu。睇下!照片中間架飛機就係我地隻風箏喇!
今日唔曬又清涼,去BBQ真係好舒服,希望呢個秋天仲有機會再同潼潼一齊去BBQ啦。
今日帶潼潼出尖沙咀睇煙花。我地以為煙花八點開始,但係原來係九點。我地早左成個鐘頭有多,所以都算叫做企個好位等睇煙花。
呢張相係煙花未開始前影既,你地睇下潼潼笑得幾開心。
開始放煙花喇!
又再一次證明光速係快過聲速:潼潼睇左第一眼煙花,開心咁跟住大家大叫左一聲「哇~~」。之後聽到隆隆既響聲,已經嚇得唔願再睇,一直合埋雙眼,緊緊咁攬住姐姐。
最攪笑係,雖然潼潼無再望過煙花,但係佢一直都有跟住我地叫「哇~~」,「好靚呀!!」 後黎我抱住潼潼,佢依然係攬得我好緊,直至我叫潼潼拍手,佢先鬆開手係度拍掌,但係仍然係緊緊咁合埋對眼。真係笑死我地。
到走果陣,潼潼個樣依然係呆呆地。
今朝嫲嫲打電話黎話入黎將軍澳同潼潼飲茶。咁飲完茶之後,我地就帶潼潼去冒險樂園玩波波池喇!
因為我地怕潼潼玩創個心,已經有一排無帶潼潼去玩波波池喇!潼潼就玩得好開心,不過我要跟住潼潼就好辛苦喇!佢係咁走呀走,我就係咁爬呀爬,咁點會夠佢快丫?佢又唔怕跌,大大級樓梯都係咁碌落去,真係俾佢嚇死。
潼潼今日收到好多禮物,姑姐過黎之前已經買左公仔俾潼潼,點知行商場既時候又買左個波波。
潼潼媽又買左砌圖俾潼潼,潼潼今日都算大豐收啦。