行石春路

工作太辛苦喇，決定請番日假陪下囡囡先。行完街街就同潼潼去公園玩，仲行埋石春路添。

鑽紙箱

買左架車仔俾潼潼，屋企又出現一個紙箱喇。潼潼或者以為所有紙箱都係好好玩既，所以今晚又將d物件丟入紙箱以後，就鑽入去想拎番出黎。但係．．．．　個紙箱實在太細喇．．．．　潼潼卡住係紙箱入面．．．　

我同姐姐就笑得開心咯，可憐潼潼想爬入紙箱拎番d野，但係「見過鬼」之後又唔敢再爬入去，唯有坐係地上面喊！

家庭樂

今日一早我地就準備帶潼潼去同公公姨媽一家飲茶。

潼潼而家知道出街就要拎鞋，不過．．．　雖然佢腳已經著左鞋，但係佢仍然去拎佢其它既鞋放哂落佢既私人座駕度．．．

飲完茶之後我地就去康山吉之島shopping，又係幫潼潼買左衫同玩具 ．．．。跟住又係落鰂漁涌公園玩喇！睇下潼潼玩得幾開心。

好喇！太陽落山，天氣開始涼喇！我地都係時候走囉！

大豐收

潼潼爸星期五放假，番左上大陸為潼潼購物，戰利品包括有一大堆既兒童書籍，兩件衫，一塊神奇畫板。不過呢d對潼潼黎講都唔重要，最重要係．．．

就係呢個波波池喇！潼潼鍾意到不得了，就黎連街都唔願出，出完街番黎又即刻鑽番入去玩。

爸爸見潼潼對住個波波池乜都唔願做，怕佢會「玩物喪志」，已經下令唔可以成日開波波池俾潼潼玩喇！

 

（後話：星期日同潼潼去完街番屋企，潼潼竟然抱住大大袋既波波俾我，要我開俾佢玩呢　）

忙

呢排好忙。

原本星期六我係唔駛番工，但係今個星期已經係連續第三個星期六要番公司做野，原因係公司準備請人，我要番公司進行面試工作。唔好誤會，我無咁既本領同資格去見人地，我只係一個「旁聽生」，負責面試完畢之後俾小小意見唶。

除此之外，公司有同事放一個星期大假，我就更加忙上加忙。過去一個星期，我已經有兩晚係因為太夜番，番到屋企既時候潼潼已經訓左。有兩日見唔到潼潼，再加上連星期六都唔可以陪佢出去玩，真係有d唔係咁開心．．．　

希望黎緊既星期情況會好轉，因為同事放完假番黎，我就可以稍為鬆一口氣。加上公司請人果方面似乎都有d眉目喇！好老實講，雖然要係放假（星期六）既時候番工係有ｄ不情願，不過其實又真係好到ｄ野，可以知道更多見工既技巧呢！