遊黃埔花園

呢日同潼潼去黃埔shopping兼同miffy影下相。

去到黃埔花園入面，潼潼見到冒險樂園入面既青蛙彈彈又話要玩。

呢部青蛙彈彈o係海洋公園都有，但係我記得上次去到潼潼係唔敢玩架喎! 不過佢今次堅持要玩，就俾佢試下啦。

個衰妹今次真係唔怕喎!

夜晚同潼潼傾開計先知，佢話海洋公園部青蛙彈彈有聲，呢部無聲。初時我都唔明佢所指既「有聲」係咩意思，原來係海洋公園果部有「o胡o胡」聲既音效，而呢部無。潼潼話佢唔怕高，係怕d「o胡o胡」聲。

原~~ 來~~ 如~~ 此~~~~~ 呢個媽媽都太大意，其實潼潼一直以黎都對聲音頗敏感。有時甚至連我係佢身邊講野大聲一點都嚇得佢整個人跳一下。

一月份生日會+新年慶祝會

早陣子實在太忙，放工都夜歸，試過番到屋企時潼潼已經訓左。潼潼明顯有點唔高興，仲識得向老師「投訴」媽me夜番，而且亦變得較黐身，曾經表示唔想番學 / 要求媽me送佢番學。

1月28日潼潼學校舉行一月份生日會 + 賀年派對，潼潼媽以為自己呢日應該比較空閒一點，所以請左一日假諗住送潼潼番學同接佢放學，tum下佢開心。點知都係趕唔切完成手上既工作，雖有送完潼潼番學，就又番公司做野，到下午又趕住走番黎接潼潼放學。

雖然係咁，見到潼潼係學校玩得開心，媽me都好高興。

書面語運用

昨日老師做家訪既時候都提到講故事既時候可以嘗試讀書面語，我都解釋俾老師聽，潼潼對於用書面語講故事表現抗拒，暫時只接受我讀出書名。老師就提議我同潼潼協議一星期一次用書面語講故事。

今朝食早餐既時候，潼潼自言自語地：「食早餐，好味的早餐！」

哦．．．　雖然平時講故事時只係讀書名，但係潼潼原來已經學懂了佢第一個書面語　－　「的」。都唔錯丫！

賣物會

老師做完家訪就匆匆離開趕住番學校，因為學校今日舉行籌款賣物會。

今次賣物會售出既物品全部都由家長捐出。潼潼本來一早睇岩左同學仔捐出既「BB玩具」，不過太貴無買，只係以60蚊買左呢個迷你購物車俾潼潼。不過潼潼都好開心呢!

除左買野，仲有少少攤位遊戲。

學校既佈置咁有新年氣氛，緊係要同潼潼影番張靚相啦!

K1家訪

呢日係老師黎屋企家訪既日子，本來都幾躍躍，不過見完又覺得不外如是，唔明點解要特登上黎屋企傾，好似同平時傾既野無乜分別。

據老師所講，潼潼係學校既表現好好，好多小朋友都鐘意同佢玩，算係一個乖既小朋友，亦唔會特登做d野黎吸引老師注意。老師成日都話潼潼講野好得意﹑好老積，又會好多借口，但係講既未必係事實。係呀! 潼潼成日都可以好快咁為自己做既事情俾好多理由!

最後又提到潼潼既語言發展。潼潼而家講野發音都仲係好BB話，發音唔準。不過老師就話唔覺得係一個大問題，認為呢個年齡有咁既情況仍屬正常。老師仲話如果我擔心的話，可以遲D俾份表我測試下潼潼既發音添! 唔該哂老師。

同學仔花名

早前潼潼已經向我投訴，佢有位同學仔成日讀錯佢個名做李依「鐸」。我只好同潼潼講，叫佢講番俾同學仔知個正確發音。

呢晚爸爸問潼潼最要好既同學仔係邊個。

潼潼 : 麥卓「鐸」

潼潼媽 : 哈哈~~ 點解會叫麥卓「鐸」既?

潼潼 : 佢成日叫我李依「鐸」，咁我咪叫番佢做麥卓「鐸」囉!

估唔到咁細個小朋友就識得以牙還牙，幫同學仔改花名。

四歲生日 - 禮物篇

過左生日既星期六，我地先去買潼潼既生日禮物。生日禮物唔駛頭痛，又係潼潼一早指定既LEGO。

買完LEGO番屋企，當晚活動就一家大細齊齊砌。

四歲生日 - 蛋糕篇

生日前的一個星期六爸爸帶潼潼去訂蛋糕。潼潼當然揀左D好靚既公主糕啦!不過爸爸話果D一訂就要三磅，我地只得幾個人，無可能食得哂! 所以叫潼潼揀第二D款，點知潼潼問: 「好貴呀?」爸爸就乘機應潼潼話係，點知佢又真係好順從咁揀其它款，最後揀左一個無乜特別既熊貓蛋糕。

好喇! 潼潼親自為自己插上蠟燭

點上燭光

唱生日歌喇!

吹蠟蠋。媽ME祝願你每天健康快樂地成長。

四歲生日 - 晚飯篇

要潼潼出主意，佢成日會好快俾到答案我地，唔會好似大人咁左想右想都無決定。好似生日想食乜?潼潼就好堅決咁鐵定要去食壽司。

雖然佢自己話要食壽司，不過似乎佢志不在此。潼潼一早指明要坐係迴轉，之後食左無幾多件就停哂手。然後掛住玩迴轉帶，攪到我地要將ORDER送黎既壽司擺番上迴轉帶上俾佢拎番落黎。

睇下佢個樣幾ENJOY!

快樂每一天

POSITIVE THINKING係一個可以影響一生既人生態度。睇完曾繁光醫生既正向管教短片之後，係我記得兼有時間既情況下，晚上臨睡前我都問潼潼當日有乜野開心既事情。

曾醫生要自己小朋友每日講三件開心事情。不過年幼既孩子好簡單﹑好易滿足，要潼潼數開心既事情，永遠數不只三件。

今日其中一件開心事情，就係推IKEA入面既迷你手推車。

我地將自己D包包﹑外衣都擺到車入面讓潼潼推。雖然呢個其實係小朋友既小玩意，不過我亦不忘趁機誇讚一下潼潼因為幫忙推包包而唔駛我地拎得咁辛苦。(算係大話嗎? )

麥DULL聖誕火雞邊爐版

天寒地凍，呢晚晚餐係打邊爐。

睇下檯面上既食物，潼潼媽立即埋怨買多太少。

誰知眼闊肚窄，攪到連續兩晚打邊爐之餘，仲有食物留低。之後要諗諗點樣煮埋D剩餘物資咯!

滿足砌LAQ

除左LEGO以外，最近比較多見到一種叫LAQ既「積木」。今日同潼潼行九龍灣德福，又見到呢個積木擺PROMOTE。

見到一大箱LAQ係度，潼潼又要玩埋一份，努力好耐都未能將兩塊積木併上。不過終於俾佢將兩片積木併合埋一齊。潼潼當堂睜大眼睛，打開嘴巴，興奮得向人展示佢既傑作，佢果一刻既笑容充滿驚喜﹑滿足同自信。

好開心睇得潼潼呢個表情，只可惜我未能及時捕足到，無法將佢果一刻既喜悅影落黎。