早前買左兩盒砌圖俾潼潼，一盒係英文生字，另一盒係數字。英文生字一盒潼潼主要係砌圖案，未認得生字串法，不過就好快上手。
至於數字呢?潼潼依然係對數無乜概念。 可能因為已經玩厭左生字砌圖，今日玩砌圖既時候，潼潼居然主動要拎數字砌圖出黎玩。仲砌好左唔少添。
唔好以為潼潼真係咁叻，識得數數同埋認得D數字，其實全部都係佢逐塊逐塊砌圖試番黎。
雖然係咁，我依然好欣賞潼潼佢可以咁有毅力﹑不斷咁去嘗試。雖然而家潼潼對呢D數字同數量完全沒概念，但係只要佢有興趣，希望遲D佢會從中慢慢有所領略。
而另一個體會就係，原來讚美同鼓勵對一個小朋友真係好重要。我從來無諗過坐唔定既潼潼會對砌圖咁有興趣。而家潼潼真係好鐘意玩砌圖，而且仲好有耐性咁慢慢試添。只不過..... 串字砌圖似乎已經被打入冷宮喇.....
潼潼媽曾經有一段日子愛上了整甜品，不過已荒廢了好一段日子。近日又一時興起再次整番當時既最拿手既日式芝士蛋糕。
咁耐無整，第一次整番蛋糕，個賣想就麻麻，不過好彩味道都還可以。
潼潼都食得幾開心丫。
個蛋糕潼潼都有幫過下手(攪事)架。
今日上鍾SIR堂之前，鍾SIR簡單地為各家庭既教養問題進行分析。當提到潼潼坐唔定既性格，同埋唔肯食飯既問題時，鍾SIR話唔可以一直認為小朋友做唔到﹑改唔到，我地要將佢過往既記錄抹走，唔可以成日提住，認為佢就係咁樣。
真係枉我睇咁多育兒書藉，竟然忘記做呢一點。係唔少既書本入面都經常提到，要小朋友改變，父母先要改變自己：唔可以標籤自己既小朋友，未做就認為佢地懶散﹑無記性﹑頑皮，然後每一次犯錯就會話：你老是這樣．．．
潼潼媽好清楚呢點，有時亦睇到別人係呢方面既過失，卻自己不自知的犯上同樣錯誤，實在太大意。
經鍾SIR提一提，我又再次接納潼潼會係個乖巧既小朋友。我應該給潼潼一點信心，然後多一點鼓勵同讚賞。
有次講起潼潼未搭過纜車，所以就決定今日帶潼潼搭纜車上山頂行下。好！戴上尋日係H&M其中一件戰利品 - 賊仔帽，起行!!
又係潼潼媽係巴士上亂影既時候。
落到中環經過皇后像廣場，原來呢度影相都幾靚。
行到纜車站，嘩! 都好多人喎!攪到潼潼媽有D想縮沙。
終於上到車喇！
到山頂第一站竟然係俾呢個整手臘既鋪頭吸引左。其實潼潼岩岩出世無耐我都試過自己幫佢倒手模腳模，可惜整得唔好。今次上到黎見到，而潼潼竟然話想整，所以就幫佢做一個。因為潼潼細個，怕佢手唔定，所以要先幫佢倒模先再做手臘。睇下！潼潼個樣有D緊張呢！
上到山頂周圍行下影下相。
去遊樂場俾潼潼玩下我地就走喇！回程時潼潼仲識得叫話要搭纜車走添！不過我地最後搭左巴士。潼潼上車無耐就訓左喇！係呀！五﹑六點架喇！玩左成日都未訓過呢！
呢個就係潼潼個手模喇！咁可以以後都拖住潼潼隻手仔啦！
公司附近開左間H&M，之前去巡視過D小童衫唔係太貴，所以今日帶潼潼去血拼。
真係唔得了，一入到童裝部，潼潼即刻對眼發光咁向目標進發 - 哈佬吉米鴨咀帽，隨後既亦係大個吉米頭既上衣 - 完全不合潼潼媽既STYLE，我一向都好怕小朋友果D大大個公仔既款式。爸爸唯有一路用其它「跳跳虎」﹑「COOKIE MOSTER」去擾亂潼潼，然後我地就將D吉米衫﹑吉米帽偷偷放回架上。
我地睇中左一頂闊邊帽，潼潼最初唔肯戴，係都話要吉米貓。不過後黎讚多佢幾次佢就被讚到心花怒放，戴住頂帽好開心咁係咁o係鏡前面轉圈。我真係想將個情形錄低，不過礙於係人地間鋪入面，所以最後都無拍。
揀下揀下，戰利品如下。
共八件物品，全部幾十幾十，都已經買左四百幾蚊野。唔知係咪好事，雖然潼潼已經兩歲三個月，不過仲可以著到12至18個月既SIZE，所以都可以買到D平野。
呢對花花拖鞋50大元，可以第日去沙灘玩時著啦！
